QR Jazýshylar odaǵy tóraǵasynyń orynbasary, aqyn Aqberen Elgezek qazaq tilindegi kitap basyp shyǵarý jáne taratý isindegi máseleler týraly aityp berdi, dep habarlaidy QazAqparat.
«Eshkimge qupiia emes, qazir elimizdiń barlyq dúkenderinde qazaq tilinde jazylǵan kitaptar jetim buryshta tur. Bul týraly talai aityldy, talai jazyldy, biraq naqty sheshimin tappady. Onyń sebebi bireý-aq – másele zań aiasynda kórsetilip, sheshilmegen. Mysaly ózimniń «Bolmaǵan balalyq shaq» atty kitabymdy «Meloman» dúkeni qabyldaǵan joq. Joǵary jaqqa habarlasyp, araǵa adam salyp, ýaqytty sozyp júrip, áreń ótkizdik. Olardyń aitatyn ýáji – qazaq tilinde kitap oqylmaidy, ony eshkim satyp almaidy deidi. Onyń bári ótirik. Qazirgi jastar kitapty jaqsy oqidy. Keiin de «Meloman» osy kitabymdy eki ret qaitalap surady, iaǵni bári satylyp ketken», - dedi ol Mádeniet jáne sport ministrliginiń alqa otyrysynda.
Onyń aitýynsha, Mádeniet ministrligi Baspa isi jáne kitap saýdasy týraly zańdy qabyldaýǵa bastama kóterýge tiis. Ol zań birinshiden, qazir kitap shyǵarý isinde monopoliske ainalǵan kóptegen iri baspalardyń yqpalyn azaitar edi. Baspalar avtorlarmen jumys istep, shynaiy naryq qalyptastyrar edi. Bul ádebiettiń damýyna zor serpin beredi.
«Qazir «qoǵamdyq mańyzy bar» degen ataýmen jylda kitap shyǵyp jatyr, olar eshkim qaramaityn kitaphanalarǵa jiberiledi, naqty oqyrmannyń qolyna jetpeidi. Qoǵamdyq mańyzy bar ádebiet degen baǵdarlama kitaptary mektep kitaphanalarynda bar ma? Onyń eki sala ekeni túsinikti, biraq memleket bizde bireý. Sondyqtan, Bilim ministrligimen birlese otyryp, bul máseleni sheshýge bolady dep oilaimyn. Qazir mektep kitaphanalarynda qazaq tilindegi kitaptar sany 27 paiyz. Demek, qalǵan 73 paiyzy orys tilinde degen sóz. Otyz jyl boiy shyǵyp kelgen kórkem ádebiet ol mektepterge jetpegen, mektep sórelerinde sol sotsialistik-realizm talabymen shyqqan eski ideologiiany nasihattaityn ádebi kitaptar tur. Bul týraly arnaiy rsepýblikalyq kitaphanashylar seminarynda aityldy, sondyqtan bul sandar oidan shyǵarylmaǵan», - dep atap ótti Aqberen Elgezek.
Spiker Baspa isi jónindegi zań qabyldanyp, naqty erejeler jazylsa, sharýa birshama sheshiletinin aitty.
«Mysaly kitap dúkenderinde kezinde BAQ-qa qatysty jasaǵandai 50/50 erejesin jasaýǵa bolady – iaǵni, kitap dúkenderine 50 paiyzyn qazaqsha kitap etýdi mindetteý kerek. Baspa isi jónindegi zań jobasyn internetten qarap shyqtym, ony Ermuhamed Ertisbaev jasaǵan bolatyn. Sony zamanaýi túzetý engizip, qabyldaý kerek dep esepteimin.
Úshinshiden, qazaq ádebietin qoldaý týraly úsh jylǵa arnalǵan memlekettik baǵdarlamany qabyldaityn ýaqyt keldi. Sebebi ádebiet – barshańyz biletindei rýhani qazynamyz. Ol baǵdarlamada kórkem aýdarma isi jáne basqa da kóptegen máseleler qamtylýy kerek. Tarqatyp aita bersek, másele kóp. Biraq niet bolsa, baǵdarlama jasap shyǵýǵa ázirmiz», - dep qorytyndylady qalamger.
