Bas prokýratýra 18 maýsymda "Báse" YouTube-arnasynyń avtoryna jasalǵan qastandyqqa qatysty kúdiktilerdiń biri ustalǵanyn málimdedi.
Vedomstvo málimetinshe Ýkrainanyń quqyq qorǵaý organdary qysqa merzimde osy qastandyq uiymdastyrdy degen kúdiktilerdi anyqtaǵan.
"Bas prokýratýra Ýkrainanyń quziretti organdaryna Jakanbaev pen Karataevtyń jasalǵan qylmysqa qatystylyǵy týraly qylmystyq istiń materialdaryn berý týraly halyqaralyq tergeý tapsyrmasyn joldady. 21 maýsymda A.M. Jakanbaev Qazaqstan Respýblikasynyń ishki ister organdaryna óz betinshe habarlasyp, odan istiń mán-jaiy boiynsha jaýap alyndy. Sol kúni ol osy qylmysty jasady degen kúdikpen ustaldy", – delingen habarlamada.
Al qastandyqqa qatysty ekinshi kúdikti M. Karataev áli izdestirilip jatyr. Bas prokýratýra tergeý múddesine qarai istiń mán-jaiyn jariia etpedi.
Eske salaiyq, 18 maýsymda Ýkrainada oppozitsioner Aidos Sadyqty atyp ketkeni týraly habarlaǵan edik.
Strana.ua basylymy Kievte belgisiz bireý belgili qazaqstandyq belsendi Aidos Sadyqovqa oq atty dep, quqyq qorǵaý organdaryndaǵy derekkózdi keltirdi. Qastandyq tús aýa Kievtiń Shevchenkov aýdanynda bolǵan. Sadyqov áieli ekeýi kólikke jaqyndaǵan kezde belgisiz bireý oq atqan.
Keiin Aidos Sadyqtyń jubaiy Natalia Sadyqova Aidos Sadyqty óltirmek bolǵan qylmyskerlerdi anyqtaǵanyn málimdegen.
