Almatyda jańartylǵan Bas jospardy engizý boiynsha júieli jumys jasalyp jatyr. Bul jumys sáýlet-qala qurylysyna baqylaýdy kúsheitýmen qatar júredi. Óńirlik kommýnikatsiialar qyzmeti alańynda qala ákiminiń orynbasary Beibit Shahanov habarlaǵandai, qala ortasyn damytý salasyndaǵy strategiialyq sheshimder Qala qurylysy keńesi men sáýlet-qurylystyq baqylaý organdary arqyly iske asyrylady.
«Qala qurylysy keńesi – qala úshin mańyzdy jobalardy qarastyratyn alqaly konsýltativtik organ. Onyń quramyna táýelsiz sáýletshiler, osy salanyń mamandary kiredi, olar jobalardyń júzege asýyna qoǵamdyq baqylaý jasaidy. Bul rette memlekettik organdardyń qala qurylysy keńesinde daýys berý quqyǵy joq», – dedi Beibit Shahanov.
2022–2025 jyly Keńestiń 26 otyrysy ótip, 395 joba qaralǵanymen, onyń jartysy jýyǵy ǵana – 47,8%-y maquldanǵan. Jobany qaraǵan kezde qasbet sheshimine, osy zamanǵy tehnologiiany qoldanýǵa, halyqtyń tyǵyzdyǵyn eskerip, sáýlettiń qorshaǵan qurylysqa sai bolýyna erekshe nazar aýdarady.
Memlekettik sáýlet-qurylys baqylaýy da asa mańyzdy baǵyttyń biri sanalady. Tek osy jyldyń ózinde 1 300-den astam jospardan tys tekserý júrgizilip, 350 mln teńgege ákimshilik aiyppul salynyp, 600-den astam zań buzýshylyqty joiý týraly nusqama berildi. Ásirese qurylys-montaj jumysynyń sapasyna, merdigerden bastap jobalaý men tehnikalyq qadaǵalaý uiymdaryna deiingi qurylys barysyna atsalýshylardyń barlyǵynyń jaýapty bolýyna asa kóp kóńil bólingen.
«Biz qurylys-montaj jumysynyń oryndalýyna baqylaýdy kúsheitý boiynsha júieli jumys júrgizip jatyrmyz. Bul rette litsenziiadan aiyrý — naryqty senimsiz kompaniialardan tazartýdyń eń tiimdi joly bolyp otyr. Biyl 5 qurylys kompaniiasy qurylys júrgizý litsenziiasynan aiyrylyp, tehnikalyq qadaǵalaý qyzmetimen ainalysatyn 2 uiymnyń akkreditatsiiasy toqtatyldy», – dep atap ótti ákimniń orynbasary.
Jyl basynan beri sotqa shamamen 80 talap-aryz berilip, onyń jartysy qanaǵattandyryldy. Talap-aryzdyń 42-si nysandardy tolyq nemese ishinara buzýǵa qatysty bolǵan. Jalpy qala boiynsha jyl basynan beri 38 zańsyz qurylys buzylyp, taǵy 70 nysandy aldaǵy ýaqytta buzý josparda tur.
Beibit Shahanovtyń aitýynsha, basty maqsat – jobalaýdan bastap nysandy paidalanýǵa berýge deiingi ár protsess zań talabymen iske asatyndai etetin tiimdi baqylaý júiesin qalyptastyrý.
