الماتىدا جاڭارتىلعان باس جوسپاردى ەنگٸزۋ بويىنشا جٷيەلٸ جۇمىس جاسالىپ جاتىر. بۇل جۇمىس سەۋلەت-قالا قۇرىلىسىنا باقىلاۋدى كٷشەيتۋمەن قاتار جٷرەدٸ. ٶڭٸرلٸك كوممۋنيكاتسييالار قىزمەتٸ الاڭىندا قالا ەكٸمٸنٸڭ ورىنباسارى بەيبٸت شاحانوۆ حابارلاعانداي, قالا ورتاسىن دامىتۋ سالاسىنداعى ستراتەگييالىق شەشٸمدەر قالا قۇرىلىسى كەڭەسٸ مەن سەۋلەت-قۇرىلىستىق باقىلاۋ ورگاندارى ارقىلى ٸسكە اسىرىلادى.
«قالا قۇرىلىسى كەڭەسٸ – قالا ٷشٸن ماڭىزدى جوبالاردى قاراستىراتىن القالى كونسۋلتاتيۆتٸك ورگان. ونىڭ قۇرامىنا تەۋەلسٸز سەۋلەتشٸلەر, وسى سالانىڭ ماماندارى كٸرەدٸ, ولار جوبالاردىڭ جٷزەگە اسۋىنا قوعامدىق باقىلاۋ جاسايدى. بۇل رەتتە مەملەكەتتٸك ورگانداردىڭ قالا قۇرىلىسى كەڭەسٸندە داۋىس بەرۋ قۇقىعى جوق», – دەدٸ بەيبٸت شاحانوۆ.
2022–2025 جىلى كەڭەستٸڭ 26 وتىرىسى ٶتٸپ, 395 جوبا قارالعانىمەن, ونىڭ جارتىسى جۋىعى عانا – 47,8%-ى ماقۇلدانعان. جوبانى قاراعان كەزدە قاسبەت شەشٸمٸنە, وسى زامانعى تەحنولوگييانى قولدانۋعا, حالىقتىڭ تىعىزدىعىن ەسكەرٸپ, سەۋلەتتٸڭ قورشاعان قۇرىلىسقا ساي بولۋىنا ەرەكشە نازار اۋدارادى.
مەملەكەتتٸك سەۋلەت-قۇرىلىس باقىلاۋى دا اسا ماڭىزدى باعىتتىڭ بٸرٸ سانالادى. تەك وسى جىلدىڭ ٶزٸندە 1 300-دەن استام جوسپاردان تىس تەكسەرۋ جٷرگٸزٸلٸپ, 350 ملن تەڭگەگە ەكٸمشٸلٸك ايىپپۇل سالىنىپ, 600-دەن استام زاڭ بۇزۋشىلىقتى جويۋ تۋرالى نۇسقاما بەرٸلدٸ. ەسٸرەسە قۇرىلىس-مونتاج جۇمىسىنىڭ ساپاسىنا, مەردٸگەردەن باستاپ جوبالاۋ مەن تەحنيكالىق قاداعالاۋ ۇيىمدارىنا دەيٸنگٸ قۇرىلىس بارىسىنا اتسالۋشىلاردىڭ بارلىعىنىڭ جاۋاپتى بولۋىنا اسا كٶپ كٶڭٸل بٶلٸنگەن.
«بٸز قۇرىلىس-مونتاج جۇمىسىنىڭ ورىندالۋىنا باقىلاۋدى كٷشەيتۋ بويىنشا جٷيەلٸ جۇمىس جٷرگٸزٸپ جاتىرمىز. بۇل رەتتە ليتسەنزييادان ايىرۋ — نارىقتى سەنٸمسٸز كومپانييالاردان تازارتۋدىڭ ەڭ تيٸمدٸ جولى بولىپ وتىر. بيىل 5 قۇرىلىس كومپانيياسى قۇرىلىس جٷرگٸزۋ ليتسەنزيياسىنان ايىرىلىپ, تەحنيكالىق قاداعالاۋ قىزمەتٸمەن اينالىساتىن 2 ۇيىمنىڭ اككرەديتاتسيياسى توقتاتىلدى», – دەپ اتاپ ٶتتٸ ەكٸمنٸڭ ورىنباسارى.
جىل باسىنان بەرٸ سوتقا شامامەن 80 تالاپ-ارىز بەرٸلٸپ, ونىڭ جارتىسى قاناعاتتاندىرىلدى. تالاپ-ارىزدىڭ 42-سٸ نىسانداردى تولىق نەمەسە ٸشٸنارا بۇزۋعا قاتىستى بولعان. جالپى قالا بويىنشا جىل باسىنان بەرٸ 38 زاڭسىز قۇرىلىس بۇزىلىپ, تاعى 70 نىساندى الداعى ۋاقىتتا بۇزۋ جوسپاردا تۇر.
بەيبٸت شاحانوۆتىڭ ايتۋىنشا, باستى ماقسات – جوبالاۋدان باستاپ نىساندى پايدالانۋعا بەرۋگە دەيٸنگٸ ەر پروتسەسس زاڭ تالابىمەن ٸسكە اساتىنداي ەتەتٸن تيٸمدٸ باقىلاۋ جٷيەسٸن قالىپتاستىرۋ.
