QR Joǵary sot tóraǵasy Jaqyp Asanov artyq jumysty qysqartyp, sottarǵa tek prokýratýra arqyly ǵana júginýdi usynyp otyr, dep habarlaidy QazAqparat tilshisi.
Bas sýdianyń aitýynsha, búginde biznesti basqarý tehnologiialaryn memlekettik organdarǵa engizýge ábden bolady. Sóitip, jumystyń tiimdiligin arttyrýǵa múmkindik bar. Máselen, Ekonomikalyq yntymaqtastyq jáne damý uiymyna múshe elderde «New Public Management» paradigmasy 80-shi jyldary engizildi. «Braian Treisi top menedjerler arasyndaǵy bir saýalnamanyń nátijesin jariialady. Onda bir ǵana suraq boldy. Tabysty jumystyń basty qupiiasy nede? Barlyǵy birdei jaýap berdi. Tabysty jumystyń qupiiasy - naqty ári nátijesi bar ónimderge basymdyq berý. Sol siiaqty tanymal Stiv Djobs 1996 jyly «Apple» kompaniiasyna qaityp kelgende, eń aldymen, qajetsiz ónimderdiń 70 protsentin qysqartyp tastady. Sóitip, qalǵan 30 protsentke kúsh saldy. Sonyń nátijesinde brendke ainalǵan ónimder shyqty. Sol kezde Stiv Djobstyń aitqan bir sózi bar, «Sizder daryndy mamansyzdar, bos nársege ýaqyt ketirýdiń qajeti joq!». Osydan keiin 4-aq ónimdi qaldyryp, sonyń negizinde jahandyq kompaniia quryp aldy», - dedi J.Asanov.
Osy oraida Joǵarǵy sot tóraǵasy tanymal biznes keńesshi Djim Kollinzdiń bir sózin de eske aldy. Amerikandyq jazýshynyń sózine qaraǵanda, tabysty kompaniialar der kezinde qajetsiz nárseden bas tarta bildi. Al ondai protsesti «eski-qusqy nárseden qutylý» dep ataidy. «Biz sot júiesinde de artyq jumyspen ainalysamyz. Sýdialardyń júktemesi tym kóp. Sotqa kez kelgen materialdy ala beremiz. Sot tóreligine jata ma, joq pa, oǵan kóńil bólmeimiz», - dep atap kórsetti J.Asanov.
Bas sýdianyń aitýynsha, sýdialar tek daý-damailary bar isterdi ǵana qaraýy qajet. Áitpese, búginde barlyq materialdardyń 70 protsentinde daý-damai joq, iaǵni jaýapqa tartylatyndar aryz berýshilerdiń shaǵymyna qarsylyq bildirmeidi. Máselen, turǵyn úi kommýnaldyq qaryzdardy óndirýge qatysty eshqandai daý-damai týyndamaidy. Sebebi qaryz bolyp qalǵan adam óz kinásin biledi. Ondai isterdiń sheshimi anyq. Al oǵan sýdialardyń biraz ýaqyty da, kúsh-jigeri de ketedi. «Máselen, Astana qalasy Saryarqa aýdandyq sotynda árbir sýdia kúnine tórt isti qaraidy. Árbir is boiynsha otyrys ótkizý kerek. Oǵan qosa, keńesý bólmesinde otyryp, tórt sheshimdi jazyp shyǵý qajet. Biraq jumys onymen bitpeidi. Bir kúnde 150 sanktsiiany berý kerek. Ony keiinge qaldyrýǵa bolmaidy. Sebebi sanktsiialar birden berilýi shart. Al ondai qarbalasta jumystyń sapasy bola ma? Árine, bolmaidy», - deidi J.Asanov.
Joǵarǵy sot tóraǵasy sýdialardy artyq jumystan bosatý qajet dep sanaidy. Daý-damailary joq isterdi qysqartýdan bólek sanktsiialardyń sanyn da azaitqan jón. Máselen, bank esepshottaryna qatysty sanktsiialardy prokýratýra bere alady. Sondai-aq, barlyq qylmystyq ister sotqa tek prokýratýra organdary arqyly ǵana túsýi tiis. Búginde Joǵarǵy sottyń bastamasyn quziretti memlekettik organdar qoldap otyr. Osynyń arqasynda sýdialardyń qazirgi júktemesin aitarlyqtai azaitýǵa bolady.
QR Joǵarǵy sot tóraǵasy osyǵan deiin sýdialardyń júktemeleriniń kóptigine bailanysty bir kúnde 16 sheshim shyǵarýǵa májbúr ekendigin aitqan bolatyn.
Aita keteiik, búgin Astanada investitsiialyq jáne kommertsiialyq daýlardy sheshý máselesine arnalǵan halyqaralyq seminar bastaldy. Otandyq jáne sheteldik sarapshylar Ekonomikalyq yntymaqtastyq jáne damý uiymynyń osy saladaǵy tájiribesin zerdelep, ony Qazaqstanda engizý jaiyn qarastyrýda.
