Tumaýǵa shaldyqpaý úshin durys tamaqtanyp, ýaqytyly uiyqtaý kerek. Jumysta bir adam syrqatanyp qalsa, infektsiiany búkil ujymǵa taratýy múmkin. Al bul ekonomikaǵa keri áserin tigizedi. Bul jaiynda Qazaqstan Respýblikasy densaýlyq saqtaý ministrligi qoǵamdyq densaýlyq saqtaý komitetiniń tóraǵasy Jandarbek Bekshin №9 qalalyq emhanada ótken brifing barysynda málimdedi, dep habarlady Sputnik Qazaqstan tilshisi.
Jandarbek Bekshin aldymen tumaýdyń aldyn alýǵa kómektesetin sharalar týraly aitty.
"Adamnyń deni saý bolýy úshin durys tamaqtanyp, ýaqytyly uiyqtaýdyń mańyzy zor. Sondai-aq, tamaq quramynda dárýmender kóp bolýy kerek. Jidekterden shyrǵanaq pen itmuryndy shikidei nemese qainatyp sýyn ishýge keńes beremin. Al jemisterden limon men greifrýttyń paidasy mol. Ózimiz halyq emi retinde paidalanatyn piiaz ben sarymsaq tumaýdy rasymen de emdeidi", — dedi ol.
Ári qarai ol jumys berýshilerge qyzmetkerlerine vaktsina saldyrýǵa kómektesýdi ótindi. Sondai-aq, munyń qandai jaman saldary bolýy múmkin ekenin aityp ótti.
"Adamdar kóp júretin qoǵamdyq oryndarǵa barmaǵan jón. Ásirese, esik-terezesi ashylmaityn bólmelerge kirmeý kerek. Aýyryp qalǵan bolsańyz, mindetti túrde betperde kiińiz. Jumys berýshilerge qyzmetkerlerdiń tumaýmen aýyrýy ekonomikaǵa keri áserin tigizetinin aitqym keledi. Kóp adam qatar aýyryp qalsa, olardyń barlyǵy emdelýge májbúr bolady. Sol sebepti ár jumys berýshi belgili bir shara qoldanyp, qyzmetkerlerine vaktsina salýǵa kómektesse nur ústine nur bolatyn edi. Basshylar qol astyndaǵy adamdardyń aýyryp qalmaýyna jaǵdai jasaýy tiis. Birneshe minýttyq paida keiin keri áserin berip, bir qyzmetker tumaýdy búkil ujymǵa juqtyrýy ǵajap emes", — dedi tóraǵa.
Qazaqstanda búginde kóbinese infektsiialyq aýrýlarǵa 5 jasqa deiingi balalar shaldyǵady. Bekshinniń aitýynsha, eresekter ózderin emdegenimen, balalardyń densaýlyǵyna asa mán bermeidi. Dálirek aitsaq, elimizde infektsiialyq aýrýlarǵa shaldyqqandardyń 65-70%-i balalar men jasóspirimder.
