Qazaqstandyqtar shetelden Qazaqstanǵa oralatyn kezde vaktsina alǵanyna qaramastan PTR-synama tapsyrýǵa mindetteldi. Májilis depýtaty Ǵani Hamzin bul el konstitýtsiiasyn buzý ekenin aityp, bul qaýlyny joiýdy usyndy, - dep habarlaidy Tengrinews.kz tilshisi.
Ǵani Hamzin Qazaqstan Konstitýtsiiasynyń 21-baby 2-tarmaǵynda keltirilgen "Árkimniń respýblikadan tys jerlerge shyǵýǵa quqyǵy bar. Respýblika azamattarynyń respýblikaǵa erkin oralýǵa quqyǵy bar" degen joldardy mysalǵa aldy.
"Elimizdiń negizgi zańy árbir azamattyń shetelden Qazaqstanǵa eshbir qiyndyqsyz oralý quqyǵyna kepildik beredi. Degenmen, koronavirýsqa bailanysty keibir jaǵdailarda azamattardyń quqyǵy men múddesine qaishy keletin quqyqtyń qalyptasýyna yqpal etti. Shetelge shyǵatyndar PTR-synamasynyń teris nátijesin kórsetetin anyqtamasyz elge orala almaidy", - dep túsindirdi depýtat.
Onyń aitýynsha, bul qiyndyqtar bas memlekettik sanitariia dárigeriniń 2022 jylǵy 13 qańtardaǵy №3 qaýlysynan keiin paida bolǵan. Osy qaýlyǵa sáikes, Qazaqstan Respýblikasyna kiretin adamdar memlekettik shekarany kesip ótýge deiin keminde 72 saǵat buryn COVID-19 synamasynyń teris nátijesi kórsetilgen PTR-taldaýyn tapsyrýǵa mindetti.
"Áýekompaniia basshylaryna vaktsinanyń tolyq kýrsynyń bar-joǵyna qaramastan anyqtamany usynbaǵan jolaýshylardy bortqa jibermeý uiǵarylady. (...) Eger Qazaqstan azamattarynyń saldyrǵan vaktsinalary elge kirýge jaramsyz bolsa, nege salǵyzdy?" - dedi Hamzin.
Onyń aitýynsha, bul máselede adamdar qarjylyq qiyndyqtarǵa tap bolady. Qazaqstanda PTR-synamasy 7 myń teńge turady, al shet elderde quny 20-dan 150 dollarǵa deiin. Mysaly, 5 adamnan turatyn otbasy 750 dollar tóleýge májbúr bolady, ol shamamen 322 myń teńge. Qazaqstanda buǵan 35 myń teńge shyǵar edi.
"Eger otbasyndaǵy adamdardyń synaqtary teris bolsa, onda qiyndyq aiaqtalady. Al oń nátije bolǵan jaǵdaida Qazaqstan azamattary qonaqúide, karantin jaǵdaiynda turýǵa jáne tamaqtaný qyzmetterin óz betinshe tóleýge májbúr bolady. Karantin aiaqtalǵannan keiin olar Qazaqstanǵa biletterdi qaita alýǵa nemese paidalanylmaǵan biletter boiynsha aiyppul sanktsiialaryn óteýge májbúr bolady. Bizge qazaqstandyq otbasylar qonaqúide osyndai "eriksiz" turý aqysyn tólep, Otanyna oralý úshin nesie resimdeýge májbúr bolǵan jaǵdailar belgili.
Biraq mundai shekteýler Konstitýtsiianyń tikelei buzylýy, azamattardyń Otanyna kedergisiz oralý quqyǵynyń buzylýy. Mundaǵy másele qazaqstandyqtardyń qosymsha shyǵystarynda da, biýrokratiialyq kedergilerde de emes. Is memlekettiń óz Konstitýtsiiasy men azamattyq quqyqtaryn qurmetteýde", - dedi depýtat.
"Aqjol" fraktsiiasynyń depýtattary azamattarǵa shetelge shyǵý maqsatyna qaramastan, turǵylyqty jeri boiynsha PTR tapsyra otyryp, PTR-anyqtamasynsyz elge kirýge jáne bas sanitariia dárigeriniń 2022 jylǵy 13 qańtardaǵy №3 qaýlysyn joiýǵa ruqsat berýdi talap etti.
