QR Bas memlekettik sanitar dárigeri Aijan Esmaǵambetova áleýmettik jelide aýaǵa belgisiz gazdyń taralýyna qatysty jariialanyp júrgen qaýesetke senbeýge shaqyrdy, dep habarlaidy "Ult aqparat".
Ortalyq kommýnikatsiialar qyzmetinde ótken baspasóz máslihatynda osy máselege qatysty suraq qoiyldy.
«Túnde aýaǵa belgisiz gazdy shashý jaǵdaiy bolyp jatqandyǵy týraly turǵyndar arasynda habarlama taralýda. Osy oraida túnde úidiń terezelerin jabý, balalardy dalaǵa shyǵarmaý kerektigi aitylyp jatyr. Osy aqparat qanshalyqty shyndyqqa janasady?», - delingen qoiylǵan saýalda.
Óz kezeginde Aijan Esmaǵambetova bul qaýeset shyndyqqa sai emestigin jetkizdi.
«Qandai da bir qospalardy aýaǵa shashýǵa bailanysty aqparat durys emes ári shyndyqqa janaspaidy. Bul turǵyda tek tekserilgen aqparatty, sondai-aq resmi aqparat kózderinen alýdy suraimyn», - dedi Bas memlekettik sanitar dáriger.
