Arnaiy prokýror OQO-da zorlandy delingen jeti jasar balaǵa qatysty isti óndiriske qabyldady, - dep habarlaidy "Ult aqparat" Bas prokýratýranyń baspasóz qyzmetine silteme jasap.
"Bas prokýrordyń tapsyrmasy boiynsha arnaiy prokýror Ońtústik Qazaqstan oblysynyń kishkentai turǵynyna qatysty zorlyq áreketteri týraly aryz boiynsha sotqa deiingi tergep-tekserýdi óz óndirisine qabyldady. Qylmystyq-protsestik kodekske sáikes, kámelettik jasqa tolmaǵandardyń quqyǵyn saqtaý jáne bolǵan oqiǵanyń mán-jaiyn anyqtaý maqsatynda barlyq qajetti sharalar qabyldandy", - delingen habarlamada.
Sondai-aq, protsestiń barlyq qatysýshysynyń ótinishhattary negizinde keshendi sot-meditsinalyq saraptamaǵa kásibi mamandar jumyldyrylatyny aitylady.
"Qylmystyq istiń tergelý barysy Bas prokýratýranyń baqylaýynda. Istiń figýranttary jasóspirimder bolǵandyqtan, Qylmystyq-protsestik kodekstiń 532-babyna sáikes, kámeletke tolmaǵandardyń quqyqtarynyń qupiialylyǵyn saqtaý qajettigin eskertemiz. Jeke ómir týraly málimetterdi kópshilik aldynda, sonymen qatar buqaralyq aqparat quraldaryn qoldaný arqyly jariia etken úshin Qylmystyq kodekstiń 147-baby boiynsha qylmystyq jaýapkershilik qarastyrylǵan", - delingen Bas prokýratýranyń saitynda.
Sonymen qatar, tergeý nátijesi týraly aqparat jasóspirimderdiń quqyǵy men zańdy múddelerin eskere kele, qoǵam nazaryna tiisti kólemde jetkiziletini aitylady.
Munyń aldynda QR bala quqyqtary jónindegi ýákili Zaǵipa Bálieva zorlyq kórdi delingen jeti jasar balanyń anasy onymen bailanysqa shyqqanyn aityp, balanyń búgin anasymen kezdesetinin aitqan bolatyn.
Sondai-aq, osyǵan deiin QR bala quqyqtary jónindegi ýákili Zaǵipa Bálievanyń zorlyq kórdi delingen oqýshy balamen kezdeskeni habarlanǵan bolatyn. Bálievanyń aitýynsha, balanyń densaýlyǵy men quqyǵyn qorǵaý maqsatynda tergeýshi balaǵa eshkimniń de qandai da bir suraq qoia almaityn qaýly shyǵarǵan.
Eske salaiyq, Saryaǵash aýdany Abai aýylynda turatyn 7 jasar balanyń zorlanǵany týraly aqparat qoǵamda qyzý pikirtalas týǵyzdy. Balanyń ájesi quqyq qorǵaý organdaryna nemeresin joǵary synyp oqýshylary zorlap kelgenin aityp, aryzdanǵan. Qylmystyq is qozǵaldy.
Qazir bala Astanada. Keshendi ári tolyqqandy saraptama júrgizilgennen keiin tiisti sharalar qoldanylatyn bolady.
Aita ketý kerek, daýly jaǵdaidan soń OQO ákimi Janseiit Túimebaev birqatar sheneýnikke sógis jariialap, jumystarynan shettetti. Abai men Saryaǵash eldi mekenderinde politsiia qyzmetkerleri ornynan ketti.
