Bas prokýror Jaqyp Asanov sottyń "Qorǵas" ShYHO eks-prezidenti Vasilii Nidiń isine qatysty sheshimine qatysty pikir bildirdi, - dep habarlaidy kaz.tengrinews.kz tilshisi.
"Osy iske qatysty shýdyń kóp bolýy jaqsy boldy deýge bolady. Sizderdi durys estidińizder - óte jaqsy boldy. Bul degenimiz bizdiń qoǵamymyz jetile bastady degen sóz. Nemquraily qaraý, iske aralaspaý degen dúnieler qaldy, belsendilik baiqalady. Bir jaǵynan, biz, memlekettik organdar men sottar, sizderge ashylyp jatyrmyz. Birneshe jyl buryn mundaidy elestetý múmkin emes edi. Sebebi barlyǵy jabyq tártipte ótip jatty. Al búgin barlyǵy ashyq", - dedi Jaqyp Asanov Májilis otyrysynda.
Sondai-aq, jýrnalister bas prokýrordyń osy atyshýly is týraly ne oilaitynyn surady.
"Eshbir elde eshqashan minsiz zańdardyń bolmaitynyn eskerý qajet. Osydan 2-3 jyl buryn bir jigit sumdyq jol apatyn jasaǵan bolatyn. Saldarynan bir adam qaza taýyp, birneshe adam zardap shekti, týystary ony keshirdi. Qylmystyq is toqtatyldy. Nelikten toqtatyldy? Sebebi QR Qylmystyq kodeksiniń 68-baby osy qylmysty toqtatýdy mindettedi. Biraq qoǵam bul sheshimmen kelisken joq. Olar ashýlandy. Nátijesinde Parlament osy 68-bapty ózgertti. Jol apatyn jasaǵan jigit qazir dál sol áreketin qaitalasa, mindette túrde túrmege qamalady", - dedi bas prokýror.
"Qorǵas" ShYHO eks-prezidenti Vasilii Nidiń isi jaily aita kele Jaqyp Asanov QR Qylmystyq kodeksiniń 65-babyna toqtalyp ótti.
"Bolǵan jaǵdaidy eskere otyrsaq, 65-bap sotqa osyndai sheshim qabyldaýǵa quqyq beredi. Iá, sot ony kináli dep tanydy. Bul sottyń quqyǵy, eshkim sot zańdy buzdy dep aita almaidy. Sýdia osy isti qarai otyryp, barlyq tarapty tyńdap osyndai sheshimge kelip, 65-bapqa toqtady. Olar aiypty dep tanylyp, kem degende bir jyl tergeý izoliatorynda boldy. Aiyptaý úkimi bar, biraq olar jazadan qutylyp ketti", - dedi bas prokýror.
"Endi sizderge meniń jeke pikirm qyzyq bolyp tur ma?", - dep surady Jaqyp Asanov jýrnalisterden.
"Muny men sheshpeimin. Muny Parlament sheshedi. QR Qylmystyq kodeksiniń 65-babyn ózgertýimiz kerek. Osy qylmysqa 65-bap múlde qoldanylmaýy kerek, meniń jeke pikirim osyndai. (...) Biraq sot zańdy buzdy dep aitýǵa da bolmaidy. Narazylyq tek bir jaǵdaida qabyldanady, iaǵni mańyzdy zańbuzýshylyqtar bolǵan jaǵdaida. QR Qylmystyq nemese Qylmystyq-protsestik kodeksindegi zańbuzýshylyqtar bolǵanda. Aiqyn ári naqty zańbuzýshylyq joq - bul sottyń quqyǵy", - dedi Jaqyp Asanov.
Osyǵan deiin Bas prokýratýra "Qorǵas" ShYHO eks-prezidentiniń qylmystyq jaýapkershilikten bosatylýyna qatysty pikir bildirgen bolatyn.
Eske salaiyq, million dollar para alǵan jerinen ustalǵan "Qorǵas" ShYHO burynǵy prezidenti Vasilii Ni qylmystyq jaýapkershilikten bosatylǵany habarlanǵan edi. Bul týraly Almaty qalasynyń qylmystyq ister boiynsha sot alqasynyń tóraǵasy Baqytjan Qarmanovtyń resmi saýalǵa bergen jaýabynda aitylady. Sondai-aq, investorlarmen jumys bóliminiń basshysy Mahabbat Saidýllaevanyń da qylmystyq jaýapkershilikten bosatylǵany belgili boldy.
"Prokýrordyń ótinishi boiynsha jáne sottalýshylardyń osyǵan deiin sotty bolmaýyna, jumys orny men turǵylyqty jerinen jaǵymdy pikirler bolǵandyqtan jáne sottalýshy Saidýllaeva Mahabattyń asyrap alǵan kishkentai balasy bolýyna bailanysty sot QR Qylmystyq kodeksiniń 65-babynyń 1-bóligi negizinde ("Shynaiy ókinýine bailanysty qylmystyq jaýaptylyqtan bosatý") jaýapkershilikten bosatty", - degen edi sottaǵylar resmi saýalǵa bergen jaýaptarynda.
5 qyrkúiekte "Qorǵas" ShYHO prezidenti million dollar para alyp jatqan jerinen ustalǵan bolatyn. Ol osy para úshin investitsiialyq tenderdiń nátijelerin sheship berý úshin alǵan delingen edi.
