Keibir qyzmetkerlerimiz qolyndaǵy biligin asyra paidalanyp, azamattardy qinap, uryp-soǵyp, aryn aiaqqa taptaidy. Bul týraly búgin túrme reformasyna arnalǵan forýmǵa qatysqan QR Bas prokýrory Jaqyp Asanov málimdedi, - dep habarlaidy "Ult aqparat".
«Kún tártibinde ózekti másele bar. Ol – adamdardy azaptaýmen kúresý. Bul adamǵa qarsy jasalatyn eń qatygez, eń aiaýsyz qylmys. Keibir qyzmetkerlerimiz qolyndaǵy bilikti asyra paidalanyp, azamattarymyzdy qinaidy, uryp-soǵady. Aryn aiaqqa taptaidy. Asylynda, bul – sumdyq. Al, dalada 21-ǵasyr», — dedi forýmda J.Asanov.
Bas prokýror birneshe mysal keltirdi. Qaraǵandyda Siniavin degen azamatty azaptaǵany sonshalyq, ol epilepsiia ushyrap, saldarynan múgedek bolyp qalǵan.
«Slekishinaǵa qatysty oqiǵany búkil respýblika biledi. BAQ jarysa jazdy. Tek osy bir Slekishinaǵa qatysty oqiǵa búkil quqyq qorǵaý júiesine kir keltirdi. Bul tek ashylǵan qylmystar. Al qansha qylmysty biz bilmeimiz. Dálelsiz keibir qylmystar qalyp jatyr», — deidi ol.
Onyń aitýynsha, azapqa ushyraǵandar - ómir bir boiy bilikke ókpeli. Olar bilik qorǵaýdyń ornyna qorlaidy dep esepteidi. «Osydan keiin qandai bizge halyq tarapynan qandai senim bolýy múmkin. Sondyqtan biz osy máselemen ainalysyp jatyrmyz», — dedi J.Asanov. Aita keteiik, túrme reformasyna arnalǵan IV forým barysynda 2013-2016 jyldary atqarylǵan jumystardyń qorytyndysy shyǵaryldy. «Túrmedegilerdiń sanyn azaitýdyń 10 qadamy» jobasy, 2017 jylda túrmedegilerdi jumyspen qamtý jáne olardy qoǵamǵa qaitarý jobalary talqylandy. Ári búgin forýmda «Azaptaý joq qoǵam» jańa jobasy tanystyrylyp jatyr.
«Bul tórtinshi forým. Osyǵan deiin úsh forýmdy ótkizdik. Árbir forýmdy bir máselege arnap kelemiz. Birinshi jyly "túrmedegilerdi azaitýdyń on sharasy" degen jobany bastadyq. Ekinshi jyly qamaýda otyrǵandardy jumyspen qamtimyz dedik. Úshinshi jyly olardy bosaǵan soń qoǵamǵa beiimdeýdi talqyladyq. Osy jobalardyń barlyǵy qazir júzege asyp jatyr. Jalpy, bizdiń memlekettik apparatta bastamalar kóp.
Jasyrmai, moiyndaýymyz kerek: «Anany bastap jatyrmyz, erteń mynadai nátije bolady, osyndai nátijege jetemiz» dep ylǵimaqtana beremiz. Biraq keiin nátije bolmai jatady. Búgin erekshe kún, biz úsh jarym jyl buryn bas qosyp, bir maqsatty qoidyq, soǵan jettik. Endi osy jobany búgin jabamyz. Bul jumysty jobalyq formattan kúndelikti formatqa aýystyramyz», — dedi J.Asanov.
