Foto ashyq derekkózden alyndy
Bas prokýror Berik Asylov Májiliste depýtattardyń Qańtar oqiǵasyna qatysty saýalyna jaýap berdi, dep habarlaidy QazAqparat agenttigi.
Ótken aptada Májilis depýtaty Edil Jańbyrshin qańtar oqiǵasyna qatysty halyqtyń kókeiinde júrgen suraqtarǵa tiisti kúshtik qurylymdar men memlekettik organdardyń basshylary Májiliske kelip jaýap berýin talap etken bolatyn.
«Qańtar oqiǵasy búkil eldi dúr silkindirip, bárimizge úlken syn boldy. Búginde qolymyzda tolyq málimetter bar. Tergeý organdary oqiǵa hronologiiasyn, negizgi uiymdastyrýshylardy anyqtady. Olardyń ishinde joǵary laýazymdy adamdar men uiymdasqan qylmystyq top músheleri de boldy. Barlyq qaza bolǵandardyń kim ekenin, olardyń qaitys bolý sebepterin zerttedik. Qarý-jaraqty izdeý jalǵasýda. Qylmyskerlerdi jaýapqa tartýdamyz. Olardyń ishinde qyzmet múddesinde opasyzdyq jasap, azamattardyń qaýipsizdigin qamtamasyz etpegender de bar. Azaptaý boiynsha isterdi aiaqtap jatyrmyz», - dedi Berik Asylov Májilistiń búgingi otyrysynda.
Bas prokýratýra sol oqiǵalardy, olardyń saldaryn eske salý úshin Qańtar oqiǵasy týraly beinerolik usyndy. Beinerolik málimetine sáikes, qasiretti qańtarda elimiz boiynsha 5149 adam jaralanyp, 238 adam mert bolǵan. Olardyń 19-y – kúshtik qurylymdardyń qyzmetkerleri.
«Jappai tártipsizdik barysynda qaza tapqandarǵa erekshe nazar aýdarý kerek. Mysaly, obektilerdi qorǵaý jáne lańkestikke qarsy operatsiia barysynda 238 azamat qaza tapty, olardyń 41 buryn sottalǵan. Bas prokýratýra tergeý barysynda barlyq aqparatty qaita tekserip, 67 azamattyń jappai tártipsizdikterge qatysqanyn, 142 adam terrorizmge qarsy operatsiia kezinde erekshe rejimdi buzǵanyn, 4 adam basqa quqyq buzýshylyqtar barysynda qaza tapqanyn anyqtady», - dedi ol.
Sondai-aq, Berik Asylov beibit miting týraly zańnyń barlyq normalary buzylǵanyn tilge tiek etti.
«Bul kúni qasietti Táýelsizdigimizge orasan zor qater tóndi. Kóptegen iri qalalardyń ǵimarattary órtke oranyp, astań-kesteń boldy. Basty qundylyǵymyz – adam ómirine qaýip tóndi. Prezident qabyldaǵan batyl qimyldar nátijesinde ǵana elge tóngen qaýip-qaterdiń beti qaitty. Ol kúnderi barlyq zańnama buzyldy. Ókinishke orai, qoǵamda beibit miting ótkizý mádenieti qalyptaspaǵanyn moiyndaýymyz qajet. Adamdar jinalyp, kóshege shyqqanda, beibit miting týraly zańnyń barlyq normalary buzyldy», - dedi Bas prokýror.
Onyń aitýynsha, uiymdastyrýshylar ákimdikti habardar etpei, myńdaǵan adam jinaldy. WhatsApp pen Telegram arqyly tártipsizdikke qatysýshylardyń jinalýy men qozǵalysyn úilestirgen.
«Almatyda sanaýly saǵat ishinde bir toptyń ǵana ishinde qatysýshylar sany 5,5 myńǵa deiin kóbeidi. Sol siiaqty Jambyl oblysynda qatardaǵy qatysýshylar sany 4 myńǵa deiin ósti. Keiin tobyr áseri oryn aldy. Adamdar politsiianyń zańdy talaptaryn oryndamai, qarsylyq kórsetti, órtedi, tonady jáne kúsh qoldandy. Bul úshin Almatyǵa arnaiy kórshi oblystardan adamdar kele bastady.
Keiin jaǵdai ýshyǵa tústi. Tek bir kúni 5 qańtarda 8 óńirde ákimdikke shabýyl jasaldy. Tártipsizdikke qatysýshylar muny biliktiń simvoly retinde basyp alǵylary keldi. 5 qańtarǵa qaraǵan túni shabýyldaýshylar Almaty ákimdiginiń ǵimaratyna basyp kirdi. Bir saǵattan keiin, Shymkenttegi ákimdik ǵimaratyna shabýyl bastaldy. Sol kúni qylmyskerler Atyraý men Qyzylorda oblysy ákimdikteriniń ǵimaratyna shabýyl jasai bastady. Shamamen sol ýaqytta Almatyda shabýyldaýshylar ákimdikti órtep, Prezident rezidentsiiasyna qarai baǵyt aldy», - dedi Asylov.
