QR Bas prokýrory Jaqyp Asanov kásipkerlerdi negizsiz qylmystyq istermen mezi etken ekonomikalyq tergeý organdaryn synǵa aldy, dep habarlaidy Ult.kz tilshisi QazAqparat agenttigine silteme jasap.
Bas prokýratýranyń derekteri boiynsha, qazirgi ýaqytta salyq organdarynyń táýekeldi kásiporyndar, kúmándi operatsiialar týraly xabarlamalary qylmystyq iske ainalýda. Ekonomikalyq qylmystar týraly 10 belginiń 7-ýin quzyrly organdardyń ózderi bergen. Nátijesinde mundai xabarlamalar eki esege ósken. Sáikesinshe, salyqtyq tekserýler de eki ese artqan. Degenmen, árbir ekinshi qylmystyq is toqtatylǵan. Olar quzyrly organnyń aktisi bolmaǵandyqtan toqtatylypty.
«9 myń is qozǵalyp, ol boiynsha qylmystyq protsess bastalǵan. Tergeý, shekteý sharalary, shotqa toqtam salý - quqyq qorǵaý organdarynyń jumys formaty múldem basqa. Salyq organdary - qadaǵalaý organdary emes. Bul protsesti quqyq qorǵaý organdary júrgizedi. Sol qylmystyq isterdiń jartysynan astamy toqtatylǵan. Osyndai qylmystyq qýdalaýdyń bastamashylary memlekettik kirister komitetiniń eki organy, bir-birimen xat almasyp, kimge qylmystyq is qozǵaǵysy keldi, soǵan qozǵaidy. Bundai bylyq, kez kelgen memlekette barlyq ekonomikalyq tergeý organdarynyń basshylyǵyn jumystan shyǵarýǵa jeter edi. Osy áreketterdi der ýaqytynda baiqap, tosqaýyl bolmaǵan prokýrorlar da bar», - dedi J. Asanov QR Bas prokýratýranyń alqa májilisinde.
Bas prokýrordyń orynbasary Marat Axmetjanovtyń sózinshe, qylmystyq qýdalaýǵa ushyraǵan, alaida, qylmys quramy bolmaǵandyqtan keiin toqtatylǵan isterdiń tergeý xronometrajy jasalǵan. Ol ortasha eseppen 90 kúnge jalǵasqan.
«Biznesmenderge osy úsh aidyń ishinde quqyq qorǵaýshylardyń barlyq qýdalaý arsenaly qoldanylady: tintý, jaýap alý, shotqa toqtam salý. Mundai qysymǵa shydaityndar az. Mysaly, Memlekettik kirister komitetiniń belgisi boiynsha, 5,5 mln teńgege operatsiia jasalǵany úshin Shymkentte «Intern Ftor Shymkent» kompaniiasynyń qyzmeti negizsiz úsh aiǵa toqtatylǵan. Ony negizsiz jalǵan kásipkerlik boiynsha qylmystyq is qozǵalǵan. Esepshotyna toqtam salyp, qujattaryn alyp qoiǵan, kelisimsharttar jasaýǵa tyiym salǵan, salyqtyq tekseris taǵaiyndaǵan. Óz kezeginde ol tekseris eshqandai zań buzý áreketin anyqtamaǵan. Osy ýaqyt aralyǵynda bul firma óziniń iskerlik bedelin joǵaltty, jetkizýshiler syrt ainalǵan, firma qazirgi ýaqytta bankrottyqqa ushyrady, jumys oryndary jabyldy», - deidi Axmetjanov.
Onyń sózinshe, árbir altynshy qylmys qana rastalǵan.
«Ekonomikalyq tergeý organdaryna aitamyn, sizder Prezident salyp jatqan ekonomikalyq saiasatqa tosqaýyl bolyp jatyrsyzdar. Kórdińizder me, qandai sumdyq! Sizderdi bizneske jiberip, ózderińdi jumys istetý kerek», - dedi Bas prokýror J. Asanov.
