Qazaqstanda 9 maýsymda ótetin kezekten tys prezident sailaýyna bailanysty saýalnama júrgizgen eki azamat ákimshilik jaýapqa tartyldy. Bul týraly 23 mamyrda Qazaqstan Bas prokýratýrasy óziniń resmi saitynda habarlady.
Prokýratýra taratqan habarǵa qaraǵanda, "VKontakte" áleýmettik jelisinde sailaý boiynsha qoǵamdyq pikirge saýal salǵan Almaty qalasynyń turǵyny 17 mamyrda 15 ailyq eseptik kórsetkish mólsherinde (37 875 teńge) aiyppulǵa kesilgen. Vedomstvo habarynda "Facebook" áleýmettik jelisinde jasaǵan quqyq buzýshylyǵy úshin Almaty oblysynyń turǵyny tap osyndai ákimshilik jaýapqa tartyldy" dep jazylǵan.
Buǵan deiin, 21 mamyrda Qazaqstan adam quqyqtary jónindegi halyqaralyq biýro Taldyqorǵanda Nur Itjanov esimdi belsendiniń sailaý týraly saýalnama júrgizgeni úshin 37 875 teńge aiyppulǵa kesilgenin habarlaǵan. 23 mamyrda biýro apelliatsiialyq sot belsendige shyqqan sheshimdi ózgerissiz qaldyrǵanyn jazdy.
Prokýratýra qazaqstandyq "Nur.kz" mnternet-resýrsynyń da ortalyq sailaý komissiiasyna eskertýsiz saýalnama júrgizgenin jazǵanymen, basylymnyń qandai jaýapqa tartylǵanyn kórsetpegen.
Vedomstvo Qazaqstan ákimshilik quqyq buzýshylyq týraly kodekstiń 120-babynda sailaýǵa bailanysty qoǵamdyq pikirge saýal salýdy júrgizý sharttaryn buzǵandar jaýapqa tartylatynyn eskertken. Zań boiynsha, saýalnama júrgizý erejesin buzǵan jeke tulǵalarǵa – 15, zańdy tulǵalarǵa 30 ailyq eseptik kórsetkish mólsherinde aiyppul salynady.
Qazaqstanda kezekten tys prezident sailaýy 9 maýsymda ótedi. Ortalyq sailaý komissiiasy jeti adamdy prezidenttikke kandidat retinde tirkegen:
- Sádi-Bek Túgel - "Uly dala qyrandary" respýblikalyq qozǵalysy;
- qazirgi prezident Qasym-Jomart Toqaev - "Nur Otan" partiiasy;
- Amangeldi Taspihov - Qazaqstan kásipodaqtar federatsiiasy;
- Daniia Espaeva - "Aq jol" partiiasy,
- Tóleýtai Rahymbekov - "Aýyl" partiiasy;
- Jambyl Ahmetbekov - "Qazaqstan komýnistik halyq partiiasy";
- Ámirjan Qosanov - "Ult taǵdyry" qozǵalysy.
11 mamyrda elde sailaý aldyndaǵy úgit-nasihat kezeńi bastaldy. Ol 8 maýsymǵa deiin sozylmaq.
