QR Bas prokýrorynyń aǵa kómekshisi Azamat Sarǵazin respýblikalyq referendým aiasynda miting ótkizýdiń tártibin túsindirdi, dep habarlaidy QazAqparat.
«Referendým aldynda úgit júrgizý maqsatymen jinalystar men mitingiler ótkizý tártibi 2020 jylǵy 25 mamyrda qabyldanǵan «Beibit jinalystardy ótkizý jáne uiymdastyrý tártibi týraly» Zańmen retteledi. Sáikesinshe, azamattar men qoǵamdyq birlestikterdiń osy sipattaǵy jinalystar men mitingiler ótkizý nieti bolsa, habarlama jasaý tártibi qarastyrylǵan. Olardy ótkizý týraly habarlama ákimdikke belgilengen kúnge 5 jumys kúni qalǵalǵa deiin keshiktirilmei jazbasha berilýi tiis.
Ondai beibit jinalystyń maqsaty men nysany, uiymdastyrýshylar men qoǵamdyq tártipti saqtaýǵa jaýapty adamdardyń derekteri kórsetiledi. Ákimdik habarlamany tirkegen kúnnen bastap 3 jumys kúni ishinde qaraýǵa tiis. Osy 3 kún ótkennen keiin ákimdik tarapynan jaýap bolmaǵan jaǵdaida uiymdastyrýshy berilgen habarlama boiynsha jinalys ótkizýge quqyly», - dedi Bas prokýrordyń aǵa kómekshisi.
Sondai-aq, ol atalǵan habarlamany qaraý nemese jergilikti atqarýshy organnyń sheshimin alý merzimderi ótkennen keiin ǵana osyndai is sharalarǵa qatysýǵa úgitteýge bolatynyn eske saldy. Bas prokýratýra ókili referendým kezinde beibit jiyndar ótkizýdiń talabyn buzǵandarǵa qandai jaza qoldanylatynyna toqtaldy.
«Eger osy talaptar saqtalmai, jmnalys nemese mitingiler jergilikti ákimdikke tiisti habarlama berilmesten uiymdastyrylyp, ótkizilse, uiymdastyrýshylar da, qatysýshylar da ákimshilik jaýapqa tartylýy múmkin. Mundai áreketter úshin ákimshilik quqyq buzý týraly kodekstiń 488-baby boiynsha, eskertý, aiyppul jáne qamaý túrinde jaza kózdelgen.
Jergilikti atqarýshy organ jinalysty nemese mitingini ótkizýdi kelisýden resmi túrde bas tartqan jaǵdaida da olardy ótkizýge tyiym salynady jáne ákimshilik jaýaptylyqqa ákep soqtyrady. Eger bul áreketter azamattardyń, uiymdardyń, qoǵamnyń nemese memleketterdiń quqyqtary men zańdy múddelerine eleýli ziian keltirýmen qatar júrse, Qylmystyq kodekstiń 400-baby boiynsha qylmystyq jaýaptylyq týyndaidy. Ol 200 AEK-ke deiingi mólsherde aiyppul nemese 200 saǵatqa qoǵamdyq jumystarǵa tartý, ne 50 táýlikke deiingi merzimge qamaý túrinde jazany kózdeidi», - dedi Azamat Sarǵazin.
