Bas prokýratýra Prezident Qasym-Jomart Toqaevtyń tapsyrmasynan keiin kedendegi tekserýdiń qorytyndysy týraly aitty, - dep habarlaidy "Ult aqparat" vedomstvonyń baspasóz qyzmetine silteme jasap.
"Kedendik tólemderdi tóleýden jaltarý jáne taýarlardy jalǵan deklaratsiialaý derekteri anyqtaldy, sonyń saldarynan memleketke 165 milliard teńge zalal keltirildi. Tek Qytaimen shekaralas keden beketterinde taýarlardy jalǵan deklaratsiialaýdyń 367 deregi anyqtaldy", - delingen habarlamada.
Ýákiletti ekonomikalyq operatorlar kásipkerlerdi salyqtan jaltarý úshin sońǵy eki jylda 221 milliard teńgeniń shot-faktýralaryn qoldan jasaǵany habarlandy.
"Tekserý júrgizilgen bir aidyń ishinde jalpy quny 800 million teńge bolatyn kontrabandanyń 16 deregi anyqtaldy. Mysaly, Group Of The Companies Tda JShS júkterin tekserý kezinde jalpy quny 287 million teńgeniń deklaratsiialanbaǵan taýary anyqtaldy. JShS direktory M. qamaýǵa alyndy", - dedi baspasóz qyzmeti.
Sondai-aq, laýazymdy tulǵalar tarapynan zańsyz is-áreketter deregi tirkelgen.
"Biyl 27 qańtarda "Bereket Logistik" JShS júgin qaita tekserý kezinde prokýratýra qyzmetkeri quny 127 million teńge bolatyn 22 tonna kontrabandany anyqtady, al "Nur joly" keden beketiniń mamany Moshkanov alǵashqy tekserý júrgizip, deklaratsiialanbaǵan taýardyń salmaǵy tek 337 kelini kórsetti", - dedi Bas prokýratýra.
Almaty Memlekettik kirister departamentiniń qyzmetkerleri aqparattyq júielerdegi málimetterdi túzetý arqyly 9 importtaýshyǵa 143 million teńge somaǵa taýarlardyń kedendik qunyn tekserýden ótýge múmkindik bergen.
"Antikor men Bas prokýratýranyń birlesken kúshimen qylmystyq áreketti imitatsiialaǵan prokýratýra qyzmetkerine 50 myń dollar para bergeni úshin "Nur joly" keden beketiniń bastyǵy men onyń orynbasary ustaldy. Sondai-aq, tekserýshilerge 30 myń dollar kóleminde para bergeni úshin Cargo Management JShS ókili qamaýǵa alyndy", - dep qorytyndylady vedomstvoda.
Joǵaryda atalǵan derekter boiynsha sotaldy tergeý amaldary júrgizilip jatyr. Kedendik retteý salasyndaǵy problemalardy joiý úshin úkimetke prokýrorlyq qadaǵalaý aktisi engizildi.
