Elde jappai tártipsizdikter bastalǵannan beri prokýratýraǵa quqyq qorǵaý ókilderiniń áreketine bailanysty 32 aryz túsken, dep habarlaidy QazAqparat.
Ortalyq kommýnikatsiialar qyzmetinde ótken brifingide QR Bas prokýratýrasy Qylmystyq qýdalaý qyzmetiniń bastyǵy Serik Shalabaev osyndai málimet aitty.
«Búgingi tańda tergeý jedel toptary 546 qylmystyq isti tergeýde. Onyń ishinde 44-i terrorizm aktileri, 34-i jappai tártipsizdikter, 15-i adam óltirý boiynsha. Ýaqytsha ustaý izoliatoryna qylmys jasady degen 672 kúdikti ustaldy. Onyń 446-sy sottyń sanktsiiasymen qamaýǵa alyndy. Qujattardy teksergennen keiin jáne ustaýǵa negiz bolmaǵandyqtan prokýratýra organdary 100-den astam azamatty bosatty. Qazirgi ýaqytta qajetti tergeý amaldar júrgizilýde. Qylmystyq protseste azamattardyń quqyqtaryn qamtamasyz etý maqsatynda Adam quqyqtary jónindegi ýákilmen jáne basqa da quqyq qorǵaý uiymdarynyń ókilderimen ózara árekettesý máseleleri sheshildi. Olarǵa jetkizilgen jáne ustalǵan adamdardy ustaý oryndaryna kirý qamtamasyz etildi. Sol arqyly zańsyz kúsh qoldaný, meditsinalyq kómek kórsetpeý jáne qorǵaýshylardy kirgizbeý jaǵdailaryna táýelsiz tekserý júrgiziledi», - degen Serik Shalabaev.
Sondai-aq, ol ádiletsizdikke tap boldym dep esepteitin turǵyndarǵa qaida habarlasý kerek ekenin túsindirdi.
«Respýblikalyq advokattar alqasymen birlesip ýaqtyly jáne bilikti zań kómegin kórsetý máselesi sheshildi. Qazirgi ýaqytta prokýratýraǵa quqyq qorǵaý organdarynyń áreketine 32 aryz kelip tústi. Bul ótinishter tekserilýde, tiisti sharalar qabyldanady. Eger azamattar óz quqyqtary buzyldy dep eseptese, Bas prokýratýraǵa «115» nómiri boiynsha nemese tikelei aýmaqtyq prokýratýralarǵa habarlasa alady», - dedi Bas prokýratýra ókili.
Atalmysh brifingide Bas Prokýratýra Tótenshe jaǵdai kezinde qaza bolǵandardyń jalpy sanyn atady.
