Elimizdiń birneshe óńirinde bolǵan jappai buzaqylyq kezinde túsirilgen beinejazbalar istiń mán-jaiyn anyqtaýda septigin tigizýde. Osylaisha qarapaiym azamattar jibergen 1500-den astam beinematerial zerttelip jatyr. Bul týraly QR Bas prokýratýrasy birinshi qyzmet basshysynyń orynbasary Eldos Qilymjanov málim etti, dep habarlaidy QazAqparat.
«Azamattardyń stopterrorism.kz resmi saityna joldanǵan beinejazbalary oqiǵanyń mán-jaiyn anyqtaýǵa eleýli kómek kórsetýde. Atalǵan sait 12 qańtarda iske qosyldy. Qazirgi ýaqytta 1500-den astam aqparat tústi. Ony tergeýshiler tolyq zertteýde. Osy saitqa kelip túsken dálel materialdyń negizinde Almaty qalalyq ákimshiliginiń aldynda bolǵan jappai tártipsizdikke qatysqan tulǵalardy anyqtadyq», - dedi Eldos Qilymjanov OKQ-de ótken baspasóz máslihatynda.
Sondai-aq, Bas prokýratýra ókili septigin tigizgen, belsendi azamattarǵa alǵysyn bildirdi.
«Esterińizge sala keteiin, bul sait anonimdi. Iaǵni, aqparat joldaǵan adam týraly eshkimge aitylmaidy. Kelip túsken materialdar qylmystyq isti tergeý barysynda qoldanylady. Búkil quqyq qorǵaý organdarynyń qyzmeti qaiǵyly oqiǵanyń obektivti túrde tergelýine jáne zańbuzýshylyqtyń jol bermeýine baǵyttalǵan», - deidi ol.
