Bas prokýratýra internette taraǵan feikterge bailanysty qazaqstandyqtarǵa úndeý jasady, - dep habarlaidy "Ult aqparat".
Vedomstvo málimetinshe, otandyq aqparat keńistiginde, áleýmettik jelilerde túrli taqyrypta kórineý jalǵan aqparat taratý deregi jiilep ketken.
"Jelide blogerlerdiń arandatýshylyq, ultaralyq arazdyqty týdyratyn málimdemeleri jáne belgili bir azamattardyń ar-namysy men qadir-qasietine nuqsan keltiretin, sondai-aq birqatar azamattardyń ustalyp, qylmystyq jaýapkershilikke tartylǵany týraly jalǵan habarlamalar tarap jatyr", - delingen habarlamada.
Mundai feik málimetter qoǵamda jalǵan pikir qalyptastyryp qana qoimai, sonymen birge qoǵamdyq tártipke de teris áser etýi yqtimal, dep basa aitty vedomstvo.
"Mundai jalǵan aqparatty taratýdy negizinen blogerler ádeii jáne úshinshi tulǵalardyń múddesin kózdep júzege asyrady. Olardyń maqsaty - jeke basyn baiý jáne aqsha bopsalaý arqyly materialdyq paida alý.
Ultaralyq arazdyqty qozdyrýǵa, bopsalaýǵa, kórineý jalǵan aqparat taratýǵa baǵyttalǵan bul áreketter qylmystyq áreket bolyp sanalady. Qylmystyq kodekstiń 174, 194 jáne 274-baptary boiynsha jaýap beredi", - dep tolyqtyrdy Bas prokýratýra.
Osyǵan orai, Bas prokýratýra el azamattaryn, BAQ ókilderin, áleýmettik jeli qoldanýshylaryn zańdy qatań saqtaýǵa jáne joǵaryda atalǵan quqyq buzýshylyqtardyń eshqaisysyn jasamaýǵa, arandatýshylyqqa boi aldyrmaýǵa jáne tek resmi aqparat kózderine senýge shaqyrady.
