QR Bas Prokýrorynyń orynbasary Bolat Dembaev qazaqstandyqtarǵa úndeý jariialady. QazAqparat úndeýdiń tolyq mátinin taratady.
***
Qurmetti azamattar!
2020 jylǵy 7 aqpanda Jambyl oblysynyń Qordai aýdanynda jappai tóbeles oryn alǵan.
Búginge birqatar qylmystyq ister tergelýde, olardyń barysynda barlyq kinálilerdi anyqtap, zańmen belgilengen jaýaptylyqqa tartý úshin sharalar qamtamasyz etiletin bolady.
Degenmen jekelegen tulǵalar bolǵan oqiǵalardy burmalai otyryp, ulttyq negizdegi quqyqqa qarsy áreketterge shaqyrý arqyly kórineý jalǵan aqparatty qasaqana taratýda.
Áleýmettik jeliler men messendjerlerde beine jáne aýdiomaterialdardy ornalastyrýdyń jańa faktileri, sonyń ishinde Qordai aýdanyndaǵy oqiǵalarǵa bailanysty emes jáne óńir men eldegi ultaralyq turaqtylyqqa qaýip tóndiretinder júieli túrde tirkelýde.
Quqyq qorǵaý organdary osyndai arandatýshylyq jariialanymdardyń avtorlarynyń jeke basyn anyqtady, olar qylmystyq jaýapkershilikke tartylýda.
Almaty qalasynda 1990 jáne 1987 jyldary týylǵan eki azamat «Facebook» áleýmettik jelisinde zorlyq-zombylyq jasaýǵa shaqyrǵan.
2020 jyldyń 9 aqpanynda Taraz qalasynyń 1983 jyly týylǵan turǵyny «WhatsApp» messendjeri arqyly osy tektes shaqyrýlar taratqan.
Olarǵa qatysty Qylmystyq kodekstiń 272-babynyń 3-bóligi (azamattardy zorlyq-zombylyqqa shaqyrý) boiynsha sotqa deiingi tergep-tekserý bastaldy.
Zańdylyqty, qoǵamdyq qaýipsizdikti qamtamasyz etý jáne quqyq buzýshylyqtardyń aldyn alý maqsatynda elimizdiń barlyq turǵyndarynan meniń úndeýime kóńil aýdarýdy suraimyn!
Qazaqstan Respýblikasy Konstitýtsiiasynyń 39-baby ultaralyq kelisimdi buzatyn kez kelgen is-áreketterge tyiym salady.
Osy talapty buzý ulttyq arazdyqty jáne alaýyzdyqty qozdyrý jónindegi qasaqana is-áreketter (QK-tiń 174-baby), jappai tártipsizdikke ne azamattarǵa zorlyq-zombylyq jasaýǵa shaqyrý (QK-tiń 272-baby) jáne kórineý jalǵan aqparat taratý (QK-tiń 274-baby) qylmystyq jaýaptylyqqa ákep soǵady.
Osyǵan bailanysty azamattardy shyndyqqa sáikes kelmeitin málimetterdi taratpaýǵa jáne arandatýshylyqqa berilmeýge shaqyramyn.
Jambyl oblysynyń Qordai aýdanyndaǵy oqiǵalar boiynsha tergeý barysy men nátijeleri týraly shynaiy aqparat buqaralyq aqparat quraldarynda, ishki ister jáne prokýratýra organdarynyń resmi Internet-resýrstarynda ornalastyrylýda, qoǵamǵa brifingterde jetkizilýde.
Quqyq qorǵaý organdary kez kelgen quqyq buzýshylyqtardyń jolyn kesedi jáne olardy boldyrmaý jóninde zańda kózdelgen sharalardy qabyldaidy.
Qazaqstan Respýblikasy Bas orokýrorynyń orynbasary B. Dembaev
