Qazaqstan Respýblikasy Bas Prokýrorynyń orynbasary B.B. Dembaev «Prokýratýra týraly» Zańnyń 31-baby tártibinde qazaqstandyqtarǵa úndeý joldady, dep habarlaidy "Ult aqparat".
«Biyl 28 maýsymda prokýratýra organdary buqaralyq aqparat quraldary arqyly beibit mitingiler men jinalystar ótkizýdiń tártibi men sharttary týraly zańǵa túsinikteme berdi. Memleket mundai jariia is-sharalardy ótkizýge konstitýtsiialyq quqyqty iske asyrýdy «Qazaqstan Respýblikasynda beibit jinalystar, mitingiler, sherýler, piketter jáne demonstratsiialar uiymdastyrý men ótkizý tártibi týraly» Zań sheńberinde qamtamasyz etedi» delingen úndeýde.
Sonymen qatar, onda áleýmettik jelilerde atalǵan zań talaptaryn buzyp, 2019 jylǵy 6 shildede sanktsiialanbaǵan mitingterdi uiymdastyrýǵa jáne oǵan qatysýǵa arandatýshylyq shaqyrýlardy taratý áli de jalǵasyp jatqany aitylǵan.
«Júrgizilip jatqan úgit - jekelegen adamdardyń jappai tártipsizdikti uiymdastyrýǵa jáne eldegi jaǵdaidy turaqsyzdandyrýǵa baǵyttalǵan kezekti talpynysy. Konstitýtsiia men ulttyq zańnamaǵa sáikes mundai is-áreketterge tyiym salynady jáne jaýapkershilikke ákep soǵady. Osyǵan bailanysty, quqyq qorǵaý organdary atalǵan zańsyz is-áreketterdiń jolyn kesetin bolady. Ruqsat etilmegen jariia aktsiialardy uiymdastyrýǵa jáne ótkizýge shaqyrý, ne olarǵa qatysý Ákimshilik quqyq buzýshylyq týraly kodekstiń 488-baby boiynsha jaýapkershilik qarastyrylǵan (sanktsiialanbaǵan aktsiiany uiymdastyrý ne oǵan qatysý)» delingen habarlamada.
Odan bólek, bul áreketter azamattardyń, uiymdardyń, qoǵamnyń nemese memlekettiń quqyqtary men zańdy múddelerine eleýli ziian keltirse, onda Qylmystyq kodekstiń 400-baby boiynsha jaýapkershilik týyndaityny (sanktsiialanbaǵan aktsiiany uiymdastyrý ne oǵan qatysý, eger olar eleýli ziian keltirse) aitylǵan.
Osynyń bárin eskere otyryp, Bas prokýratýra azamattardy zańdy saqtaýǵa, arandatýshylyqqa boi aldyrmaýǵa jáne zańsyz aktsiialarǵa qatysýdan bas tartýǵa shaqyrady.
