QR Bas prokýrorynyń orynbasary Erlik Kenenbaev qańtar oqiǵasyna bailanysty ustalǵandardyń quqyǵyn buzǵandardyń ústinen neshe is qozǵalǵanyn aitty, dep habarlaidy QazAqparat tilshisi.
«Zańsyz is-áreketter, onyń ishinde azaptaýlar tergeýdiń bastapqy kezeńinde bolady. Adamdardy oqiǵa ornynan politsiiaǵa aparǵan soń olar tergeýshimen nemese jedel ýákilmen ońasha qalady. Jedel qyzmetkerler ustalǵandarmen «júrekjardy áńgime» júrgizý úshin protsessýaldyq sipattan tys qarym-qatynastarǵa jol beredi. Ustalǵandardyń kóbi óz quqyqtaryn bilmeidi, qorǵaýshy talap etip jatpaidy. Politsiia bul jaitty kóp jaǵdaida ózderine paidalanady. Sebebi ustalǵan adamdarmen jumys júrgizýdiń naqty rettelgen tártibi joq. Qańtardaǵy oqiǵalar buǵan aiqyn dálel», - dedi Bas prokýrordyń orynbasary.
Sondai-aq ol qańtar oqiǵasy boiynsha prokýratýra organdaryna túsken shaǵymdardyń qalai qaralyp jatqanyn baiandady.
«12 qańtarda Almaty prokýratýrasy zańsyz qamaýda otyrǵan qalanyń 24 turǵynyn bosatty. Atalǵan fakti boiynsha arnaiy prokýror tergeý júrgizýde.
Prokýrorlar ýaqytsha ustaý izoliatorlarynan negizsiz ustalǵan 96 adamdy bosatty.
Sonymen birge áreketteriniń aýyr bolmaýyna bailanysty 92 adamdy bultartpaý sharasy ózgertildi. Ustalǵan adamdarǵa qatysty quzyretti asyryp paidalaný, ólim, azaptaý faktileri boiynsha ister tergelip jatyr. Bul sipattaǵy 133 qylmystyq is tergelýde. Barlyq isterdiń obektivti ótýi úshin protsessýaldyq prokýrorlar belgilendi. Ustalǵan tulǵalarǵa meditsinalyq kómek qamtamasyz etildi. Qazirgi tańda qamaýda otyrǵan jáne ustalǵan 27 adamǵa qajetti meditsinalyq kómek kórsetilip otyr» - dedi Erlik Kenenbaev.
