QR Bas prokýratýrasy Qylmystyq qýdalaý qyzmeti basshysynyń orynbasary Eldos Qilymjanov qańtarda politsiiadan urlanǵan qarý jaiynda aitty, dep habarlaidy QazAqparat.
Onyń aitýynsha, biyl qańtarda quqyq qorǵaý organdary ǵimarattarynan 1 259 tabeldik qarý urlanǵan, onyń ishinde avtomattar men tapanshalar bar.
«Atap aitqanda, Almaty oblysynda Politsiia departamenti ǵimaratynan 53 avtomat, 367 tapansha, 1 granatomet, sondai-aq 20 myńnan astam patron urlandy», - dedi Qilymjanov Ortalyq kommýnikatsiialar qyzmetindegi brifingide.
Onyń sózine qaraǵanda, Jambyl oblysynda 200 avtomat, 148 tapansha, 11 granatomet, bir pýlemet jáne 40 myńǵa jýyq patron urlanǵan.
«Rezidentsiiada oiran salýdan keiin 130 qarý men oq-dáriniń jetispeitini anyqtaldy. Onyń ishinde 80 granata, 17 tapansha, 11 avtomat, 21 granatomet jáne snaiper myltyǵy bar. Atalǵan qarýdy keiinnen qylmyskerler beibit turǵyndar men quqyq qorǵaý qyzmetkerlerine qarsy qoldandy», - dedi Bas prokýratýra ókili.
