QR Bas prokýratýrasy Qylmystyq isterdi qadaǵalaý qyzmetiniń bastyǵy Serik Shalabaev qańtar oqiǵasy kezinde ustalǵan sheteldikter qandai kúdikke ilingenin málim etti, dep habarlaidy QazAqparat.
«Terrorizm jáne jappai tártipsizdikke qatysý kúdigi boiynsha ustalǵandardyń arasynda shetel azamattary boldy ma?», - dep surady depýtat Asqarbek Úisimbaev Májilistiń jalpy otyrysynda.
Bas prokýratýra ókiliniń aitýynsha, qazir 19 shetel azamaty kúdikti retinde ustalǵan.
«Búgingi kúni bizde qylmystyq óndiris boiynsha jalpy 19 sheteldik azamat bar. Onyń basym kópshiligi, 11-i – Ózbekstan azamattary, tórteýi – Reseiden, ekeýi – Qyrǵyzstannan jáne Qytai Halyq Respýblikasy men Tájikstannan 1 adamnan bar. Bul azamattardyń is-áreketteri jappai tártipsizdikterge qatysý boiynsha, urlyq jáne basqa da qylmystarmen dárejelenedi. Árine, bul málimetter túpkilikti emes. Tergeý júrip jatyr, ózgerýi múmkin», - dedi Serik Shalabaev.
