- QR Bas prokýratýrasy búginde qylmyspen kúreste aqparattyq tehnologiialardy belsendi túrde engizý qajetti qadam ekenin atap ótti, dep habarlaidy Ult.kz tilshisi QazAqparat agenttigine silteme jasap.
Bas prokýror Jaqyp Asanovtyń paiymynsha, bundai format tergeý amaldary men qadaǵalaýdyń sapasyn jaqsartady, júiede ashyqtyqty qamtamasyz etedi. Barlyq tergeletin ister onlain rejimge aýyspaq.
«Jyl saiyn 500 myń qylmystyq isti tergeimiz. Buǵan qosymsha ákimshilik quqyq buzýshylyqtar boiynsha 4,5 mln hattama bar. Iaǵni, 5 million is pen material boiynsha sheneýnikter adamǵa qandai jaza taǵaiyndaý kerektigin sheshedi. Alaida, bul kórsetkishterde turǵan eshteńe de joq. Barlyq elderde de osylaisha. Eń soraqysy, bul ister men materialdar qolmen jirgiziledi. Atap aitqanda, milliardtaǵan bettermen esepteletin qaǵazdar, qomaqty shyǵyndar baiqalady», - dep toqtaldy Asanov.
Onyń sózine qaraǵanda, qazirgi kezde shaǵymdy nemese isti zertteý úshin aiǵaqtar oblystan suralady, olar óz kezeginde isti aýdannan talap etedi.
«Bizge jetkenshe 2-3 apta ótedi. Keri jiberilgen kezde taǵy da 2-3 apta jolǵa jumsalady. Osylaisha, ister ailap kóship júredi. Ýaqyt ótken saiyn aiǵaqtar joǵalyp, oqiǵa umytyla bastaidy. Tergeý toqtap turǵandyqtan, kúdikti adam qamaýda otyrady», - dedi Bas prokýror.
Belgili bolǵandai, jyl saiyn 900 myńǵa jýyq is osyndai rásimnen ótedi.
«Jylyna 900 myńǵa tarta qaǵaz saiahattap júredi. Qaǵaz degen keshegi kún emes, ótken ǵasyr ǵoi. Qaǵazdaǵy isterdi joǵaltyp alý, joiyp jiberý nemese qoldan jasaý ońai. Máselen, aýdanda isti zańsyz túrde toqtatsa, ol taǵy bireý shaǵymdanǵansha jata beredi. Árbir isti qolmen qaita tekserip shyǵý iske aspaidy. Sondyqtan da aqparattyń osy aýqymyn sandyq formatqa aýystyrýdy kózdep otyrmyz. Bul rette azamattarǵa, qoǵamǵa qajetti paidaly istermen kóbirek ainalysýǵa múmkin bolady», - dep tapsyrdy ol.
.jpeg)