Búlikshiler beibit turǵyndar men ótip bara jatqan adamdardy ózderine qosylýǵa májbúrlegen. Bul týraly QR Bas prokýratýrasy Arnaiy prokýrorlar qyzmetiniń bastyǵy Rizabek Ojarov aitty, dep habarlaidy QazAqparat.
«Sonymen birge búlikshiler beibit turǵyndar men ótip bara jatqan adamdardy olarǵa qosylýǵa májbúrlegen. Mysaly, 5 qańtarda Almatyda qaraqshylar kóligin bermei qoiǵany úshin belgili mýzykant, prodiýserdi atyp tastaǵan. Taksi, aýyr kólikter men avtobýs júrgizýshilerin de kóshelerde tosqaýyl qoiý arqyly jabýǵa májbúrlegen. Tipti dárigerlerge shabýyl jasap, 46 jedel járdem, 551 politsiia kóligin qiratqan, 5 órt sóndirý mashinasyn órtep jibergen.
Osy is-qimyldardyń barlyǵy, onyń ishinde ákimdikterdiń, Prezident rezidentsiiasynyń, UQK, politsiia jáne basqa da nysandar ǵimarattaryn qarýmen basyp alý úshin shabýyl jasaý zań júzinde lańkestik aktisi retinde tanylady. Olar halyq arasynda úrei men qorqynysh týdyrýdy, Úkimet pen basqarý organdarynyń qalypty jumysyn isten shyǵarýdy kózdegen. Beibit sherýshiler eshqashan mundai áreketke barmas edi», - dedi Rizabek Ojarov Ortalyq kommýnikatsiialar qyzmetindegi brifing barysynda.
Onyń atap ótýinshe, zańǵa baǵynatyn adamdar bul ýaqytta úide otyrdy. Keibir sanaly azamattar tutqynǵa túsken jáne jaralanǵan qyzmetkerler men áskerilerge kómek kórsetip, olarǵa tobyrlardyń tiisýine jol bermedi.
«Sonymen birge, tártipsizdikterdiń eń qyzý kezeńinde de tártip saqshylary ólimge ákeletin qarýdy qoldanbaǵanyn atap ótý qajet. Jaralanǵandardyń basym kópshiligi qaýipsizdik kúshteri arasynda bolýy da osydan. Aýrýhanaǵa túrli jaraqattarmen 3 393 qyzmetker jetkizildi. Olar bolsa, bireýdiń ákesi, kúieýi, aǵasy nemese balasy. Olar jai ǵana ózderiniń qyzmettik jáne áskeri mindetterin atqaryp, quqyqtyq tártip pen tynyshtyǵyn qamtamasyz etti», - dedi Bas prokýratýra ókili.
