QR Bas prokýratýrasynyń qoǵamdyq múddelerdi qorǵaý qyzmetiniń bastyǵy Saparbek Nurpeiisov 21 qyrkúiekte ótýi múmkin mitingke qatysty pikir bildirdi, dep habarlaidy QazAqparat.
«Mitingterge qatysty Bas prokýratýra birneshe ret túsindirip ótti. Biraq men ruqsat berilmegen jaǵdaida qandai jaýapkershilik júkteletinin taǵy bir eske salǵym keledi. Bizdiń azamattardyń barlyǵy biledi, mitingke shyǵýdyń óz protsedýrasy bar. Mejelengen datadan 10 kún buryn ruqsat alý kerek. Eger osy tártippen ruqsat alynǵan bolsa, ony uiymdastyrýshylar eshqandai jaýapqa tartylmaidy. Al ruqsatsyz shyqsa, 15 kúnge qamaý jazasyna deiin qarastyrylǵan. Mitingti uiymdastyrýshylar azamattardyń quqyǵyna, uiymdar men memlekettiń múddesine ziian keltirse, qylmystyq jaýapkershilikke tartylady. QR QK 400-baby boiynsha 50 táýlikke deiin qamaý da bar. Sondyqtan azamattarǵa qaratyp aitqym keledi - kóshege shyqpas buryn ruqsat alý kerek», - degen Bas prokýratýra ókili 21 qyrkúiekke josparlanǵan mitingke qatysý nelikten zańsyz ekenin túsindirdi.
«Qazir ózderin «DVK» dep ataityn uiym jaqtastary 21 qyrkúiekte kóshege shyǵýǵa úndep júr. Oǵan Qazaqstan aýmaǵynda ekstremistik uiym retinde tyiym salynǵan. Esterińizge salǵym keledi, 2005 jyldan beri prokýrorlardyń ótinishi boiynsha sot 8 uiymdy ekstremistik dep tanyǵan. Olar: «Hizbýt tahrir ál islami», «Tabliǵi jamaǵat», «Senim. Bilim. Ómir», «Alǵa» Halyq partiiasy», «Halyq maidany-Narodnyi vront», «At-Takfir Ýa-al Hidja» jáne «Iakyn Inkar» jáne «DVK». Bul atalǵan uiymdar ekstremistik dep tanylǵandyqtan, olardyń qyzmetine qatysý zańmen qýdalanady. Bizdiń azamattarǵa taǵy da túsindirgim keledi - ekstremistik uiymnyń qyzmetine kez kelgen formada qatysý zańsyz», - degen Saparbek Nurpeiisov atalmysh uiymdardyń úndeýlerin áleýmettik jeli arqyly bólisýdiń qandai jazaǵa aparyp soqtyratynyn aitty.
«Bul jerde tikelei qatysý mindetti emes. Bireý jasyryn qatysyp, kólikpen qamtamasyz etýi múmkin. Bireý «DVK» jaqtaýshylary men qatysýshylardy júieli túrde jasyryp kelýi múmkin. Bireý qarjylandyryp, túrli únparaqtar taratýy múmkin. Áleýmettik jelide post pen kommentarii taratyp, bólisý de - ekstremistik uiymnyń jumysyna fizikalyq, aqparattyq, qarjylai kómektesý dep qaralady. Al buǵan zańmen tyiym salynǵan. Biz ylǵi eskertip kelemiz. Taǵy da azamattarymyzǵa qylmystyq qýdalaý sheńberinde qalmas úshin zań talaptaryn saqtaý kerektigin eskertemiz» - dedi ol.
