Qazaqstan musylmandary dini basqarmasynyń tóraǵasy, elimizdiń bas múftii Naýryzbai qajy Taǵanuly Oraza aiynda azyq-túlik baǵasyna jeńildeý jasaýǵa shaqyrdy, dep habarlaidy QazAqparat.
«Ramazan aiynda adamdarǵa kóp jaqsylyqtar jáne múmkindikter beriledi. Bul týraly ardaqty Paiǵambarymyz Muhammed (oǵan Allanyń salaýaty men sálemi bolsyn): «Bul aida jánnat esikteri ashylady», «Oraza tutqan adamnyń aldyńǵy jáne keiingi kúnálary keshiriledi», - degen súiinshi habar jetkizgen. Endeshe, qasietti aida kóbirek saýapty amal jasaýǵa asyǵaiyq, aǵaiyn. Ata-anamyzdyń, qazynaly qarttarymyzdyń duǵasy men alǵysyn alýǵa tyrysaiyq», - dedi Naýryzbai qajy Taǵanuly ortalyq kommýnikatsiialar qyzmetinde ótken baspasóz máslihatynda.
Sondai-aq, bas múfti qazaqstandyqtardy múmkindikke qarai, muqtaj jandarǵa qol ushyn berip, naýqastyń kóńilin surap, saýap alýǵa shaqyrdy.
«Osy rette kásipker azamattardy qasietti aidyń qurmeti úshin halqymyzdyń turmys jaǵdaiyn eskerip, áleýmettik mańyzy bar taýarlar men azyq-túlik baǵasyn múmkindiginshe 10 paiyzǵa deiin tómendetip, jeńildik jasaýǵa shaqyramyn. Biz qashan da ózgelerge qaiyrymdylyq jasap, ainalamyzǵa shýaǵymyzdy tógip, sharapatymyzdy tigizip, adamnyń alǵysyn alyp ósip-óngen elmiz. Halqymyzda «Qaiyrymdylyq jasasań – qaiyryn óziń kóresiń» degen naqyl sóz bar», - deidi ol.
