Qazaqstan musylmandary dini basqarmasynyń Tóraǵasy, Bas múfti Serikbai qajy Oraz saiasi qýǵyn-súrgin qurbandaryna arnaiy Quran baǵyshtap, duǵa jasady, dep habarlaidy "Ult aqparat".
Qadir túni qarsańynda Elordadaǵy «Nur Astana» meshitinde juma ýaǵyzyn aitqan Bas múfti «Qýǵyn-súrgin qurbandaryn eske alý» kúnine orai, zulmat kúnderde baqilyq bolǵan babalarymyzǵa Alladan keńshilik, raqym tiledi.
«Keler jyly da jaqsy ai, jaqsy kúnge tórt kózimiz túgel jetýdi násip etsin! Birligimiz, tatýlyǵymyz, turaqtylyǵymyz baiandy bolsyn! Alla Taǵala halqymyzǵa birlik bersin! Qudai Taǵalam bizdiń halqymyzdyń ár kezeńde júrer joly, baǵdarshamy, qoǵamnyń rýhani tiregi bolǵan dinimizge qýat bersin.Keshegi zulmat zamanda, náýbet kúnderde jazyqsyz ketken, qurban bolǵan babalarymyzdy Alla Ózi raqymyna alsyn! Paiǵambarymyzdyń shapaǵatynda bolsyn! Qudai Taǵala endi bizdiń ultymyzdyń, halqymyzdyń bolashaǵyn ondai náýbetten saqtasyn! Jaryq kúnimiz baiandy bolsyn! El aman, jurtymyz tynysh bolsyn!», - dep, elimiz ben jerimizge duǵa tiledi.
