Qazaqstan musylmandary dini basqarmasynyń (QMDB) tóraǵasy, Bas múfti bolyp Naýryzbai qajy Taǵanuly kásipkerler men dáýletti jandardy dertke shaldyqqan jáne dári-dármekke muqtaj bolyp otyrǵan otandastarymyzǵa qoldaý kórsetýge shaqyrdy, - dep habarlaidy "Ult aqparat".
«Qadirli halaiyq! Biz taǵdyr men tarihtyń náýbetti kezeńinen, alasapyran zamannyń synynan abyroimen ótken halyqpyz. Qýanyshy men qaiǵysy arpalysqan ótkinshi ómirde kez kelgen pende synalmai turmaidy. Osy kúnderde kúlli álem bir tarynyń qaýyzyna syiǵandai kúi keshýde. Biz de syndarly sáttermen betpe-bet keldik. Qaiǵyly habarlar barshamyzdyń qabyrǵamyzdy qaiystyryp, eldiń eńsesin túsirýde. Osy rette juqpaly indetten qaitys bolǵan azamattardyń jaqyn juraǵattary men aǵaiyn-týǵandaryna óz atymnan taǵy da kóńil aitamyn. Marqumdarǵa Alladan raqym, Paiǵambardan shapaǵat tileimin. Aldy peiish, arty kenish bolǵai. Qazaly úige Jaratqannyń ózi jar bolsyn. Al emdelip jatqan otandastarymyzǵa Alla shipasyn bersin. Dertinen tolyqtai aiyǵyp, tez saýyǵyp ketsin», - dedi Bas múfti.
Onyń aitýynsha, búgin meshit-medreselerimizde marqumdarǵa arnap, arnaiy Quran Hatym duǵasy jasalýda.
«Qudai qabyl etkei!. Kóptegen azamat synaq sátinde dertke shaldyqqandarǵa dári-dármek pen muqtaj jandarǵa kómektesip, qoldarynan kelgenshe kómekterin aiamaýda. Olardyń barshasyna Alla razy bolsyn. Osy rette elimizdegi barsha kásipkerler men dáýletti jandardy el igiligi úshin dertke shaldyqqan jáne dári-dármekke muqtaj bolyp otyrǵan otandastarymyzǵa qoldaý kórsetýge shaqyramyn. Eldiń igiligi men halqymyzdyń amandyǵy úshin birligimizdi kórsetetin kez keldi. Árbir jaqsylyǵymyz osy bir náýbetti kezeńnen aman-esen ótýge sebepker bolǵai!. Rabbymyz azat eldi aza tutqyzbai, el eńsesi men týymyzdy tómen túsirmei, indetti irgemizge jýytpai, mereiimizdi árqashan ústem etkei!. Eń bastysy, saǵymyz synbasyn. Jaratýshy iemizdiń járdeminen bul synaqty da jeńemiz, inshalla. Jańa kúnnen jaqsylyq kútken musylman balasy rýhyn túsirmei, keler kúndi igi nietpen qarsy alady. Qashan da bolashaqtan úmit kútedi. Denimiz qýatty, ár kúnimiz shýaqty bolǵai, ámin!», - deidi Naýryzbai qajy Taǵanuly.
Elorda ýaqytymen saǵat 13:00-de osy kúnderi qarilarymyz oqyp jatqan Quran Hatymnyń duǵasy jasalady. Al Bas múftidiń qatysýymen respýblikalyq «Áziret Sultan» meshitinde jasalatyn Quran Hatym duǵasyna QMDB-nyń Instagram jelisindegi resmi paraqshasy jáne YouTube kanaly arqyly onlain qosylýǵa múmkindik bar.
Aita ketsek elimizde qalyptasqan ahýalǵa bailanysty halyqqa úndeý jasaǵan QR Prezidenti Qasym-Jomart Toqaev 13 shildeni – Ulttyq aza tutý kúni dep jariialaityny týraly málim etken bolatyn. Tiisti ókimge Memleket basshysy kelesi kúni qol qoidy.
Qazaqstanda koronavirýs pandemiiasynyń qurbany bolǵan azamattardy eske alýǵa bailanysty búgin - Jalpyulttyq aza tutý kúni. Nur-Sultan ýaqytymen saǵat 12:00-de búkil el boiynsha bir minýttyq únsizdik jariialanady.
