QURBAN AIT QUTTY BOLSYN!
Asa qamqor, erekshe meiirimdi Allanyń atymen bastaimyn!
Qurmetti baýyrlar!
Barshańyzdy kúlli musylman qaýymy asyǵa kútken qasietti, ulyq mereke – Qurban ait meiramymen quttyqtaimyn! Otbasylaryńyzǵa amandyq, myqty densaýlyq, jumystaryńyzǵa bereke tileimin.
Bárimizdi aitqa aman-esen jetkizgen Alla Taǵalaǵa sansyz shúkirler men maqtaýlar bolsyn!
Islam dini san ǵasyrdan beri elimizdiń rýhani tiregi bolyp keledi. Halqymyz asyl dinimizdegi Jaratýshy Iemiz belgilep bergen eki meiramnyń ulyǵy, aitýly mereke – Qurban aitqa airyqsha daiyndalyp, kópshilikpen erekshe atap ótedi. Berekege bastaǵan bul mereke birlik pen igilikke, meiirim men keshirimge úndeidi.
Ait – aǵaiyn arasyn jaqyndastyra túsetin, adamzat balasyn imandylyqqa uiytyp, qanaǵat pen táýbege shaqyratyn ulyq meiram. Bul kúnderi barsha musylman qurban shalýmen ǵana emes, Uly Allaǵa unamdy árbir izgi amaly arqyly Rabbysynyń razylyǵyna, raqymyna jaqyndai túsedi. Óitkeni, arab tilindegi «qurban» sózi «jaqyn bolý», «jaqyndaý» degen uǵymdardy bildiredi.
Qasietti Quranda: «Umytpańdar, olardyń eti de, qany da eshqashan Allaǵa jetpeidi. Oǵan jetetin nárse – júrekterińizge uialaǵan taqýalyqtaryń (shynaiy nietteriń)» («Haj» súresi, 37-aiat), – dep baiandalǵan.
Ait kúnderi qajylyq paryzyn ótep jatqan musylmandar da Jaratýshyǵa jalbaryna duǵa jasap, qurbandyq shalady. Qasietti Mekke qalasynda elimizdiń amandyǵy, halqymyzdyń birligi men berekesin tilep jatqan otandastyrymyzdyń da duǵasy, qajylyǵy qabyl bolǵai!
Qarjylyq múmkindigi joq adamǵa qurban shalý – mindet emes. Qurbandyq eti aǵaiyn-týys, kórshi-qolań, turmysy tómen otbasylaryna, jetim men jesirlerge, múgedekter men naýqas jandarǵa taratylady.
Qurban ait kúni erte turyp, ǵusyl quiynyp, ait namazyna qatysý – paiǵambarymyz Muhammedtiń (Oǵan Allanyń salaýaty men sálemi bolsyn) súnneti.
Qadirli aǵaiyn!
Barsha jamaǵatty, elimizdiń janashyr azamattaryn múbárak meiramnyń qurmeti úshin múgedekterge, jetimder men jesirlerge, qaraýsyz qalǵan qarttarǵa qaiyrymdylyq jasaýǵa shaqyramyn.
Alla Taǵala duǵa-tilekterimiz ben saýapty isterimizdi jáne shalǵan qurbandyqtarymyzdy qabyl etkei! Ámin!
Erjan qajy MALǴAJYULY,
Qazaqstan musylmandary dini
basqarmasynyń tóraǵasy, Bas múfti
