Qazaqstandaǵy karantindik sharalar óziniń oń nátijesin berdi. Bul týraly onlain baspasóz máslihatynda Qazaqstannyń bas memlekettik sanitarlyq dárigeri Aijan Esmaǵambetova málim etti, dep habarlaidy "Ult aqparat".
«Sońǵy eki aptada elimiz boiynsha jaǵdai turaqtalǵany kórinip tur. Aýrýǵa shaldyǵýdyń ósimi 7 paiyzdan aspaidy. Eger naýryzda infektsiiany juqtyrý bailanysta bolǵan adamdar men syrttan kelgender arasynan tirkelse, sáýirde profilaktikalyq testileýge kóshtik. Sáýir aiynda tirkelgen barlyq oqiǵalardyń 52 paiyzy nemese 1862 jaǵdai profilaktikalyq testileýmen bailanysty boldy», - dedi A. Esmaǵambetova.
Onyń sózine qaraǵanda, profilaktikalyq testileýdiń maqsaty – ol jasyryn oshaqtardy aiqyndaý. Eger osy testileý bolmasa, onda indet juqtyrǵandarmen bailanysta bolǵandar sany artyp, koronavirýsqa shaldyqqandar sany óser edi.
«Profilaktikalyq testileý nátijesi tiisti jumysty júrgizýdiń mańyzdylyǵy men qajetin baiqatyp otyr. Jalpy, karantindik sharalar óziniń nátijesin berdi. Eki aptanyń barysynda turaqty epidemiologiialyq jaǵdaidy tirkedik. Karantin talaptaryn saqtaý boiynsha Densaýlyq saqtaý ministrligi nusqaýlaryn oryndaǵan ár qazaqstandyqqa alǵys aitqym keledi», - dedi Qazaqstannyń bas memlekettik sanitarlyq dárigeri.
