Qazaqstan quramasynyń bas bapkeri Magomed Adiev Slovakiiamen bolǵan matchty qorytyndylaý úshin baspasóz máslihatyna qatysyp, tilshilerdiń suraqtaryna jaýap berdi, dep habarlaidy "Ult aqparat" QFF baspasóz qyzmetine silteme jasap.
- Búgingi oiyn jaily ne aitasyz?
- Kez-kelgen komandanyń óz erekshelikteri bolady. Biz Slovakiianyń myqty oiynshylaryn tusap ustaýǵa tyrystyq. Qarap qalmai, qarymta shabýyldarǵa shyǵyp, gol soǵatyn múmkindikter jasadyq. Árine, qarsylas dopqa kóp ielik etti.
Biz on kún ishinde nebári on bes shaqty fýtbolshymen oinap shyqtyq. Elimizdiń kórsetken qoldaýyn da aita ketý kerek. Olar bizge kúsh berip, alǵa jeteledi.
- Qazaqstan quramasynyń mundai jetistikke jetýine ne sebep boldy?
- Fýtbolda jeńispen birge, jeńilis te qatar júredi. Belarýspen ótken matchtyń sońǵy jaǵynda gol jiberip, utylyp qalýymyz múmkin edi. Eń bastysy, biz bapkerler shtabymen birge kiim aýystyratyn bólmedegi atmosferany jaqsarta aldyq. Komandada myqty oiynshylar men úzdik bapker bola tura, birlik bolmasa, nátijege jetý óte qiyn.
Fýtbolshylar bar kúshin saldy. Bul olardyń merekesi. Bas bapkerge qaraǵanda oiynshylardyń eńbegi kóp boldy. Alǵash ret jeńisti osylai toilaǵan shyǵarmyn. Jigitterdiń arqasynda emotsiiaǵa erik berip, balasha qýandym. Bul úshin olarǵa kóp rahmet!
- Ulttyq quramaǵa kóp shaqyrtylmaityn Mihail Gabyshevtiń oiynyn qalai baǵalaisyz?
- Timýr jáne Mishamen «Shahterde» birge jumys istedim. Olardy ulttyq quramaǵa ne úshin shaqyrǵanymdy jaqsy bilemin. Qos qaptalǵa ár oiyn saiyn rotatsiia jasaý qajet boldy. Sol qaptalda Timýr, Ian jáne Ǵafýr, al oń qaptalda Mihail men Baǵdat oinai alady. Slovakiiamen bolǵan eki matchta da Gabyshev óner kórsetti. Sebebi bul oiynǵa onyń qarym-qabileti kerek dep eseptedik.
- Belarýspen bolatyn oiyndy Aqtóbede ótkizý josparda bar ma?
- Men Aqtóbedegi stadionǵa bapker retinde eki ret baryp, tamasha atmosferanyń kýási boldym. Alǵashynda pandemiiaǵa bailanysty jankúierlerdi stadionǵa kirgizbedi. Biraq olar syrtta turyp, match boiy qyzý qoldaý kórsetti. Ekinshi ret kelgende qosalqy stadionda oinadyq. Ol kezde de keremet qoldaý kórsetti. Sondyqtan Aqtóbedegi jankúierler qurmetke laiyq dep oilaimyn. Degenmen ol jaqtaǵy stadion talapqa sai kelmeidi eken. Sol sebepti ÝEFA-ǵa Belarýspen bolatyn matchty «Astana Arenada» ótkizý týraly ótinish joldap qoidyq.
