Qazaqstannyń eńbek sińirgen qairatkeri, filologiia ǵylymynyń doktory Kenjehan Matyjanov Abaidyń 175 jyldyǵyna arnalǵan poeziia jáne mýzyka keshinen alǵan áserimen bólisti, dep habarlaidy QazAqparat.
Respýblika saraiynda ótken keshte ine shanshar oryn bolmady. Saltanatty sharaǵa Almaty qalasynyń ákimi Baqytjan Saǵyntaev, ziialy qaýym ókilderi, mádeniet qairatkerleri qatysty.
Keshke qatysqan M.Áýezov atyndaǵy Ádebiet jáne óner institýtynyń direktory Kenjehan Matyjanov atalǵan is-sharanyń mańyzy men hakim Abai murasynyń ereksheligine toqtaldy.
«Meniń oiymsha, erekshe kesh boldy. Óitkeni biyl - Abai jyly. El bolyp Abaidyń mereitoiyn toilaýǵa kiristik. Barsha el Abai bolyp tebirenip, Abai bolyp jyrlap jatyr. Bul rette Almatynyń orny erekshe der edim. Óitkeni elimizdegi barlyq ziialy qaýym ókilderi, abaitanýshylar, Abaidyń ánderin, mýzykasyn oryndap júrgen ártister derlik osy qalada. Respýblika saraiynda ótken keshte halyq erekshe yqylaspen, emirene tyńdap otyrdy», –dedi Kenjehan Matyjanov.
Onyń aitýynsha, zaldyń kórermenge toly bolǵany hakim Abai murasynyń qundylyǵyn baiqatty.
«Bul keshte bári boldy. Sanamyzǵa sińgen, burynnan jattalǵan dástúrli Abaidy kórdik. Kemeńger tulǵanyń mol murasy quddy bir keshke syiyp ketkendei kúi keshtik. Abaidy jańasha túsindirýdiń, Abaidy jańasha uǵyndyrýdyń zamanaýi úlgisi kórsetildi. Ǵajap keshtiń kýási boldyq», – dedi M. Áýezov atyndaǵy Ádebiet jáne óner institýtynyń direktory.
Kenjehan Matyjanov sondai-aq osyndai is-sharalardyń arqasynda uly Abaidyń murasy zamannan tys qundy, barlyq urpaq úshin ózekti ári túsinikti bolatynyn atap ótti.
«Abaidyń máńgilik ekeni sózsiz. Abai esh ýaqytta eskirmeidi, sanamyzdan ketpeidi. Ol – bizdiń júregimizde, qazaqtyń sanasynda tur. Keshti uiymdastyrǵan, onyń stsenariiin jazyp, joǵary deńgeide oryndap shyqqan barlyq shyǵarmashylyq ujymǵa alǵys aitý kerek. Bul keshti respýblikanyń barlyq úlken sahnalaryna shyǵarsaq ta, artyq bolmaidy. Almatyda jasalǵan bul dúnieni kórsetý kerek dep oilaimyn. Álbette, talǵamǵa talas joq. Árkimniń qabyldaýy árqily. Dese de, bul kesh basqa keshten ózgerek boldy deýge ábden negiz bar», — dedi K. Matyjanov.
Sondai-aq, ol Abaidyń 175 jyldyǵyn merekeleý aiasyndaǵy is-sharalardy ótkizý jónindegi aldaǵy josparlarymen, Almaty qalasynyń mádeni astana retindegi erekshe róli týraly da áńgimeledi.
«QR Prezidenti arnaiy memlekettik komissiia qurǵany belgili. Onyń jospary da bekitilgen. Respýblika boiynsha osyndai iri sharalar óris alatyny belgili. Biraq qalai bolǵanda, kópshiligi Almatyǵa kóz tigedi. Kesh Almatynyń abyroiyna, bedeline sai keletin kesh boldy. Budan keiin de osy mánerde, osy arnada Abaidy toilaý, Abaidyń búkil shyǵarmashylyǵyna, júregine súńgý, sonyń arǵy jaǵyndaǵy shyn asyldy tabý, soǵan úńilý - bul jas urpaqqa beriletin úlken sabaq. Sondyqtan Abaidyń toiy - toilaý úshin emes, Abaidy túsiný úshin, bilý úshin, jańa urpaqqa jetkizý úshin, Abaidy keleshekke sol óziniń danyshpan qalpynda tuǵyryna qondyrý úshin jasalatyn dúnie», – dedi K. Matyjanov.
