Sybailas jemqorlyqqa qarsy is-qimyl agenttiginiń tóraǵasy Alik Shpekbaev Qostanaidaǵy «SQ-Farmatsiia» JShS dári qoimasyna bardy, dep habarlaidy "Ult aqparat".
Alik Shpekbaev Qostanai oblysyna jumys sapary aiasynda turǵyndardy dárilik preparattarmen qamtamasyz etý sharalaryna erekshe nazar aýdardy.
Ol aldymen «SQ-Farmatsiia» JShS operatsiialyq qoimasyna bardy. Qoima oblystyń emdeý mekemeleri men uiymdarynyń Nur-Sultan qalasyndaǵy habtan dárilik preparattar men meditsinalyq buiymdardy jedel alý qaǵidaty boiynsha uiymdastyrylǵan.
Túrli aýrýlardy statsionarlyq jáne ambýlatoriialyq emdeýdi qamtamasyz etý aiasynda meditsinalyq mekemelerdiń dástúrli ótinimderine de, koronavirýstyq infektsiiany emdeýge qajetti qarajatqa tapsyrystarǵa da qyzmet kórsetiledi.
«Ákimdik dári-dármek, dárigerlerdi qorǵaý quraldary, onyń ishinde gýmanitarlyq kómek aiasyndaǵy ashyqtyqqa nazar aýdara otyryp, qoǵamdyq uiymdardy belsendi túrde tartýda. Pandemiia árbir qazaqstandyqqa áser etti. Sondyqtan «barmaq basty, kóz qysty» jumys bolmaýy tiis. Árbir dári-dármek alaiaqtardyń tabys kózine ainalmai, tutynýshysyna jetýi óte mańyzdy», - dep basa aitty Alik Shpekbaev.
Aita keteiik, buǵan deiin birqatar óńirlerde monitoringtik toptar dári-dármekter men qorǵanys quraldarynyń azaimaityn qoryn qalyptastyrýdaǵy máseleler týraly málimdegen bolatyn. «SQ-Farmatsiia» Qostanai filialynyń ókilderi barlyq logistikalyq qateler eskerilgenin jáne búgingi kúni óńirde qajetti qor bar ekenin aitty.
Jergilikti atqarýshy organdardyń ókilderi habarlaǵandai, koronavirýstyq infektsiiany, pnevmoniiany jáne JRVI emdeýge baǵyttalǵan dárilik zattarmen azamattardy qamtamasyz etý maqsatynda dárihana jelileri men farmatsevtikalyq firmalardyń distribiýtorlaryna 538 mln teńge bólindi.
Agenttik tóraǵasy pandemiianyń ekinshi tolqynyna daiyndyq barysynda oblystyń materialdyq qory esebinen satyp alynǵan dári-dármekterdi satatyn «Tsvetnaia» dárihana qoimalaryn aralady.
