Barlyq bilim berý uiymy «bultty býhgalteriiaǵa» kóshýi tiis. Bul týraly QR Bilim jáne ǵylym vitse-ministri Bibigúl Asylova aitty, dep habarlaidy QazAqparat.
«Oqýshy oryndary sanyn ulǵaitý úshin 2022 jyly 200 mektep qurylysy josparlanǵan. Mehanizmi retinde biýdjetten nysanaly qurylys, memlekettik-jekemenshik seriktestik arqyly, sondai-aq jekemenshik mektepterde memlekettik bilim berý tapsyrysyn ornalastyrý kózdelgen. Qurylys jumystary ákimdikterdiń quzyrynda zańdy túrde júrgiziledi. Qarjylandyrýdyń ashyqtyǵyn qamtamasyz etý jáne tiimdiligin arttyrý maqsatynda barlyq bilim berý uiymy «bultty býhgalteriiaǵa» kóshýi tiis», - dedi Bibigúl Asylova ministrliktiń keńeitilgen alqa otyrysynda.
Sonymen qatar ol balalardyń quqyǵyn qamtamasyz etý baǵytynda qabyldanǵan memlekettik sharalardyń nátijesinde elimizdegi balalar úii tárbielenýshileriniń 81 paiyzy otbasyda ómir súrý quqyǵyna ie bolǵanyn aitty.
«Balalar úiiniń sany 30-ǵa deiin qysqardy. 2021 jyly taǵy 2 balalar úii, qiyn jaǵdaiǵa tap bolǵan balalardy qoldaýǵa baǵyttalǵan 1 ortalyq, 1 bóbekter úii jabyldy. Búginde jetim balalarǵa arnalǵan uiymdarda 4 myńǵa jýyq tárbielenýshi turady. Biz jaily jaǵdai jasaýdy baqylaý úshin de, sondai-aq balalardyń otbasynda tárbielenýi úshin de jumysty jalǵastyratyn bolamyz», - dedi vitse-ministr.
