Ulttyq ekonomika vitse-ministri Ermek Alpysov aldaǵy ýaqytta Qazaqstandaǵy 6,5 myń aýyldy eldimekenniń irgeli degen 3,5 myńyna mańyz beriletinin málim etti, dep habarlaidy QazAqparat tilshisi.
«Jalpy, Aýyldardy damytý baǵdarlamasy buryn Aýyl sharýashylyǵy ministrliginiń quzyryndaǵy arnaiy komitet arqyly júzege asyrylatyn. Men endi ol kezdegi baǵyt durys nemese burys boldy dep aita almaimyn. Qazirgi kezde negizgi ákimshi – Ulttyq ekonomika ministrligi. Elbasynyń tapsyrmasymen «Aýyl – el besigi» jobasyn qolǵa alyp, aýyldy eldi mekenderdi jańartamyz dep josparlap jatyrmyz. Buryn respýblikalyq biýdjetten qarajat aýyldardaǵy tek negizgi problemalardy – aýyz sý nemese elektr jelileri máselelerin sheshý úshin kózdelgen. Biraq, barlyq jerge álbette, memlekettiń qarajaty jetpeidi. Men atap ótkendei Qazaqstanda qazirgi tańda 6,5 myńǵa jýyq aýyldy eldimeken bar», - dedi Ermek Alpysov Úkimettiń baspasóz ortalyǵynda.
Vitse-ministrdiń aitýyna qaraǵanda, jaǵdaiy tómen, áleýeti tómen aýylǵa – birneshe júz million teńgeniń sý qubyrlary júrgizilgen jaǵdailar da bolǵan.
«Bul rette biýdjettiń qarajaty durys paidalanylmaǵan shyǵar. Sondai jaǵdai bolmaý úshin biz 6,5 myńǵa jýyq eldimekennen 3,5 myńǵa jýyǵyn iriktedik. Damý áleýeti bar aýyldardy órkendetýimiz kerek. Jumys eń aldymen sol aýyldardaǵy halyq qalaǵa kóship ketpeý úshin jasalyp jatyr. Joldaryn, mektepterin, basqa infraqurylymyn jóndep berip, baǵdarlamalar arqyly sharýa qojalyqtarǵa qoldaý bildirgen abzal. Eseptep otyrsaq, iriktelgen 3,5 myń eldi mekende aýyl halqynyń 85 paiyzy turady eken. Halyqtyń 15 paiyzy ǵana qalǵan usaq eldimekenderge qarajat bólinbeidi dep aita almaimyn. Qarajat bólinedi. Biraq, aǵymdy jumystarǵa beriledi. Ondai aýyldarda mektep salýdyń qajeti joq», - dedi ol.
