QR Prezidenti janyndaǵy Qazaqstan strategiialyq zertteýler institýty Zańnama departamentiniń direktory Asara Muqanova aýdandyq deńgeidegi ákim sailaýyn ótkizý týraly pikir bildirdi, dep habarlaidy QazAqparat.
25 shildeden bastap, Qazaqstanda aýdandyq mańyzy bar qalalardyń, aýyldardyń, kentterdiń, aýyldyq okrýgter ákimderin tikelei sailaý ótti. Jańa ereje boiynsha qazaqstandyqtar tikelei daýys berý arqyly óz eldimekeniniń ákimin sailai alady.
«Talaptarǵa sáikes, aýdandyq mańyzy bar qalalardyń, aýyldardyń, kentterdiń, aýyldyq okrýgterdiń ákimi qyzmetine joǵary bilimi bar jáne osy eldimekenniń aýmaǵynda turatyn 25 jastan asqan QR azamattary úmitker bola alady. Sondai-aq olardyń belsendi sailaý quqyǵy bolýy kerek jáne «Qazaqstan Respýblikasyndaǵy memlekettik qyzmet týraly» Zańdaǵy barlyq talaptarǵa sai bolýǵa tiis», - dep atap ótti sarapshy.
Kandidattardy saiasi partiialar óz músheleriniń arasynan nemese ekiden kem kandidat usynylsa, odan joǵary turǵan ákim usynady. Sonymen birge, úmitkerler ákim laýazymyna ózin-ózi usyna alady. Negizgi shart – sailaýshylardyń jalpy sanynyń keminde 1%-ynyń qolyn jinaý.
«Ortalyq sailaý komissiiasynyń resmi derekteri boiynsha, «Nur Otan», «Aýyl», «Aq Jol», «ADAL», «QHP» partiialarynan tikelei sailaýǵa 878 kandidat usynylǵan. Bul rette partiialarda da shekteý bolady – olar ár okrýgte bir kandidatty ǵana usyna alady. Sailaý qorytyndysy boiynsha «Nur Otan» partiiasynan basqa «Aýyl», «Aq Jol», «ADAL» partiialarynan da kandidattar sailanǵan», - deidi A. Muqanova.
Onyń aitýynsha, Parlament Májilisi men máslihattar sailaýy kezinde saiasi partiialardyń ótý shegin 7%-dan 5%- ǵa deiin tómendetý jáne saiasi partiialardyń jandanýy partiialarǵa máslihattar men Parlament Májilisine óz tizimderin usynýda oń serpin bere alady.
«Sailaýdyń taǵy bir ereksheligi – sailaý biýlletenderinde «barlyǵyna qarsy» baǵanynyń engizilýi boldy. Ákimderdi tikelei sailaýdy taldaý da «barlyǵyna qarsy» baǵanyn qosý týraly túzetýler sailaýshylardyń quqyqtaryn keńeitkenin jáne sailaý protsesiniń ashyqtyǵyna yqpal etkenin kórsetedi. Mysaly, aqparat kózderine sáikes (kazpravda.kz, regtv.kz, kt.kz), Qaraǵandy oblysy boiynsha «barlyǵyna qarsy» baǵany Aqtoǵai aýdanynyń Shashýbai kentinde (116) eń kóp belgilengen – bul daýys bergenderdiń 7 paiyzy», - deidi A. Muqanova.
