Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qisyqova koronavirýs infektsiiasyna bailanysty turǵyndardy jaýapkershilik tanytýǵa shaqyrdy, dep habarlaidy QazAqparat.
«Eger de, qala turǵyndary qazirgidei jaýapsyz, nemquraidy júrse, onda olardyń barlyǵyna aýrýhanalardaǵy dárigerler men oryndar jetkiliksiz bolady. Sáikesinshe, turǵyndarǵa meditsinalyq kómek der kezinde kórsetilmeýi múmkin. Usynylǵan sanitarlyq normalardy oryndamasańyzdar, óte kúrdeli ári aýyr jaǵdai oryn alýy yqtimal», - dedi S. Qisyqova Ortalyq kommýnikatsiialar qyzmetinde.
Osy oraida ol qala turǵyndarynyń kóbisi koronavirýs infektsiiasymen bailanysty kúrdeli jaǵdaidy elemei júrgenin atap ótti.
«Sizderdiń nemquraidy áreketterińiz dárigerler men meditsinalyq uiymdardyń tapshylyǵyna alyp kelýi múmkin. Munyń saldary Italiiadaǵy jaǵdaidyń qaitalanýyna ákep soqtyrady. Turǵyndardyń densaýlyǵy birinshi kezekti ózderiniń áreketine bailanysty», - dedi Sáýle Qisyqova.
