Mineki, jasym keldi jetpis úshke...
Estai
Halqynyń qalaýly uly, eliniń erkesi, opasy joq myna jalǵan dúniege syia almai ketken birtýar oǵlan Zamanbek Qalabaiuly Nurqadilov jer basyp júrgende 15 qańtarda jetinshi múshel jasqa tolǵan bolar edi! Asyldary men jasyndaryn kózi tirisinde kóre almaityn, tasada turyp tas atatyn, tegershigine taiaq qystyryp otyratyn halyqtyń biri de biregeii, sirá, biz bolarmyz. Eger de tiri bolǵanda Zamanbek bul kúnderi jetpis úsh jasqa tolar edi-aý. Endigi jerde bizder – batyrdyń kózin kórgender, onyń nazaryna ilikkender, shapaǵatyna ie bolǵan jandar osy bir asyl azamattyń erlik isterin, jalpaq jurtqa jasaǵan jaqsylyǵyn jyl saiyn onyń týǵan kúninde eske alyp otyrýǵa tiispiz. Bul keiingi jas órken – jas tolqynǵa ómirlik ónege, altyn qazyq bolmaq.
Zamanbek Qalabaiuly kezinde qandai qyzmet atqarsa da, ómirde aishyqty iz qaldyrdy. Ol qysqa ǵumyrynda Qazaq KSR Ministrler keńesi janyndaǵy Selden qorǵaý qurylystaryn salý jáne paidalaný jónindegi bas basqarmany, Almaty qalalyq keńesi atqarý komitetin, Almaty qalasy ákimshiligin, Almaty oblysyn, Qazaqstan Respýblikasynyń Tótenshe jaǵdailar jónindegi agenttigin basqarǵan kezde eline eleýli eńbek sińirdi. Birneshe ret Parlament depýtaty bolyp sailandy. Sóitip, halqyna qajymai-talmai qyzmet etti.
Zamanbek Qalabaiuly Almatyny basqarǵan jyldary iske batyl kirisip, aldymen qazaqtar úshin tirkelýge jabyq qala bolyp kelgen sol kezdegi astanaǵa tirkelýge ruqsat etkenin, sóitip barlyq túiindi jerlerdiń bárine (pasport ústeline, militsiiaǵa, úi basqarmalaryna, qaýipsizdik komitetine, taǵy basqa tiimdi jerlerge) ornalasyp alyp oilaryna kelgenin istegen kelimsekterdiń aptyǵyn basqany eske túsedi.
Keńestik zamanda aýzyndaǵysynan aiyrylyp, qolyndaǵysynan qaǵylyp qaǵajý kórip kelgen urpaq muny qalai umytsyn! Olarǵa múmkindiginshe úi berip, keibireýlerine úi salatyn jer alýǵa ruqsat etkeni, kóbisin jumysqa ornalastyrǵany ol kezde kishigirim tóńkeris jasaýmen para-par bolǵan edi. Zamanbektiń jurtyna jasaǵan sharapatynyń bárin aityp taýysý múmkin de emes. Ony sol sekseninshi jyldary qalaǵa tirkelip, úi alǵan, jumysqa turǵan, tipti keibireýleri kólik te alǵan qazaqtardan suraý kerek.
Ol ásirese, óner adamdaryna kóp jaqsylyq jasady. Sonyń ishinde qazaqtyń aqyn qyzy, Memlekettik syilyqtyń iegeri Fariza Ońǵarsynovaǵa qalaǵan páterin alyp bergenin onyń aqyn sińlisi Aqushtap Baqtygereeva “Meniń Farizam” degen estelik-essesinde (“Qazaq ádebieti”, 19 tamyz 2016 jyl) mysalǵa keltirip jazdy. Sondai-aq belgili aqyn, Frans Kafka atyndaǵy syilyqtyń iegeri Shómishbai Sarievke jasaǵan jaqsylyǵyn Shókeńniń ózi jyr qylyp aitady. Zamanbektiń shahar basshysy bolyp turǵan kezdegi shapaǵaty adamgershilik pen márttiktiń úlgisi deýge ábden bolar edi. Osyndai azamattyń bir kezderi:
Bári satty, jalǵyz qaldym,
Zańy solai azdyqtyń.
Izsiz jaýdan ósti tiken,
Tógildi ýy qastyqtyń, – dep kúrsingen sátteri de bolǵan.
Bul Zamanbektiń qyzmetinen alynyp, toryǵyp júrgen sátindegi kóńil tolǵanysy. Jalpy, talantty adam barlyq jaǵynan talantty bolady ǵoi.
Bahadúrsiń, batyrsyń,
Qaldyń eldiń esinde.
Damyl taýyp jatyrsyń,
Alataýdyń tósinde.
Jatqan jeriń jaryq bolsyn! Allanyń rahmaty, paiǵambarymyzdyń shapaǵaty tisin. Peiishte nuryń shalqysyn.
Ǵazizbek TÁShIMBAI
"Jas Alash" gazeti
