Bankterdiń turaqty jumys isteýine memleket te, biznes ókilderi de, qarapaiym salymshylar da múddeli. Sondyqtan bankterge teginnen-tegin qoldaý kórsetilmeidi. Bul týraly «Egemen Qazaqstan» gazetine bergen suhbatynda Memleket basshysy Qasym-Jomart Toqaev aitty, - dep habarlaidy "Ult aqparat".
«Bank júiesi – qarjy naryǵynyń asa mańyzdy bóligi. Bankterdiń turaqty jumys isteýine memleket te, biznes ókilderi de, qarapaiym salymshylar da múddeli. Sondyqtan bankterge teginnen-tegin qoldaý kórsetilmeidi. Bul – ulttyq ekonomikany kótermeleýdiń bir joly.
Qazir bankterdiń úzdiksiz qyzmet kórsetýine múmkindik bar. Depozitterge kepildik beretin qor da turaqty jumys isteýde. Bul ahýaldy Ulttyq bank baqylap otyr. Sondyqtan salymshylardyń qarajatyna eshqandai qater tónip turǵan joq», - dedi Prezident.
Q.Toqaev atap ótkendei, tótenshe jaǵdai kezinde ekinshi deńgeidegi bankter áleýmettik-ekonomikalyq ahýaldyń turaqtanýyna óz úlesin qosty dep aitýǵa bolady.
«Eń aldymen, bankter kásipkerlerge jáne azamattarǵa bergen nesieni qaitarý merzimin keiinge aýystyrdy. Naqty aitqanda, nesie tólemderi 3 aiǵa shegerildi. Tabysynan aiyrylǵandarǵa mundai kómek qajet. Biraq jurtshylyq arasynda nesieni múldem qaitarmaimyz degen túsinik qalyptaspaýy kerek. Bul – jańsaq pikir.
Sondai-aq Úkimettiń qatysýymen shaǵyn jáne orta biznes ókilderine jeńildetilgen nesie berý baǵdarlamasy ázirlendi. Eger bankter kásipkerlerge, azamattarǵa nesie berýdi toqtatsa, ekonomikanyń kóptegen salasy turalap qalady. Biz buǵan jol bermeimiz.
Meniń tapsyrmam boiynsha Ulttyq bank pen Qarjy naryǵyn retteý jáne damytý agenttigi qarjy júiesiniń turaqtylyǵyn saqtaý úshin qosymsha sharalar qarastyrýda», - dedi Memleket basshysy.
