Qyrǵyzstanda ustalǵan, 1,8 milliard teńgeden astam alaiaqtyqqa qatysy bar degen kúdikti Qazaqstanǵa ekstraditsiialandy. Ol jábirlenýshiler men ekinshi deńgeili bankterdiń qarjysyn jymqyrý shemasyn uiymdastyrǵan qylmystyq toptyń múshesi sanalady, dep habarlaidy ult.kz.
Bas prokýratýranyń málimetinshe, 2022–2024 jyldary úsh qazaqstandyq aldyn ala sóz bailasyp, qaitarylmaityn avtonesielerdi rásimdeýdiń zańsyz shemasyn uiymdastyrǵan.
Tergeý nusqasy boiynsha, olar azamattardy avtokólik satyp alý úshin bankten nesie alýǵa kóndirip, keiin kólikterdi satyp jibergen. Al túsken qarjyny óz qajetterine jumsaǵan.
Budan bólek, kúdiktiler múlde bolmaǵan avtokólikterge de nesie rásimdegen. Ol úshin jalǵan kólikter Qyrǵyzstannan ákelingen degen jeleýmen Almatydaǵy mamandandyrylǵan halyqqa qyzmet kórsetý ortalyǵynda zańsyz tirkelgen. Keiin osy kólikterdi satyp alǵandai etip úshinshi tulǵalardyń atyna bankterden nesie rásimdelip, alynǵan qarajat qylmystyq top músheleriniń ieligine ótken.
Aldyn ala esep boiynsha, zańsyz áreketter saldarynan eki ekinshi deńgeili bank pen 77 azamatqa jalpy somasy 1,8 milliard teńgeden astam shyǵyn kelgen.
Qylmystyq toptyń eki múshesine qatysty tergeý aiaqtalyp, is sotqa joldanǵan. Al úshinshi kúdikti qylmystan keiin elden boi tasalap ketkendikten, halyqaralyq izdeýge jariialanǵan.
Jedel izdestirý barysynda onyń Qyrǵyzstan aýmaǵynda júrgeni anyqtalyp, ustalǵan. Qazaqstan Bas prokýratýrasynyń suraýy boiynsha kúdikti elge ekstraditsiialanyp, tergeý izoliatoryna qamaldy.
Taǵylǵan aiyp dáleldense, onyń múlki tárkilenip, 10 jylǵa deiin bas bostandyǵynan aiyrylýy múmkin.
