Foto:banki.ua
Bankten depozittik shot ashqan kezde aldymen depozittik shotty qandai maqsatta ashatynyńyzdy anyqtap alyńyz. Kez kelgen ýaqytta aqshany sheship ala alatyn shot kerek pe, álde jinaqtyq paiyzyńyz joǵary bolǵany jón be?
Eger siz qomaqty aqsha jinap, onyń ústinen belgili bir mólsherde tabys tapqyńyz kelse, biraq qajettilikke qarai qalaǵan ýaqytta qarajatyńyzdy sheship alýǵa múmkindigińiz bolǵanyn qalasańyz, onda – merzimsiz salymdy tańdańyz. Ádette mundai depozittiń túrin «kútpegen jaǵdaiǵa» dep ashady.
Al merzimdi salymdy belgili bir maqsat úshin ashady. Mysaly úi alamyn, kólik alamyn, saiahatqa jumsaimyn degen siiaqty maqsattarǵa aqsha jinap, ústinen túsetin paiyzdyq syiaqydan tabys ta tabady. Biraq merziminen buryn qarajatty sheship alatyn bolsańyz, syiaqydan qaǵylasyz.
Sonymen qatar, tolyqtyrylatyn jáne tolyqtyrýǵa kelmeitin depozitter de bolady.
Eger barynsha tiimdi mólsherleme esebinen tezirek aqsha jinaǵyńyz kelse – tolyqtyrýǵa bolatyn jinaq depozitti tańdańyz.
Eger esh táýekelsiz, eń tiimdi shartpen kapital investitsiialaý maqsatyńyz bolsa, onda tolyqtyrylmaityn jinaq depozitti siz úshin tiimdi.
Eskerińiz! Merzimdi jáne jinaq salymdar boiynsha merziminen buryn aqsha alý qarastyrylmaǵan. Esesine olarǵa joǵary syiaqy mólsherlemesi esepteledi.
Skrin: QDKBQ resmi saitynan
Qazaqstannyń Depozitterge Kepildik Berý Qory merzimsiz salymdar boiynsha eń joǵary mólsherleme Qazaqstannyń Ulttyq Bankiniń bazalyq mólsherlemesi negizinde, al merzimdi jáne jinaq salymdar boiynsha - naryqtyq mánder negizinde esepteledi deidi.
Qazaqstannyń Depozitterge Kepildik Berý Qory merzimsiz, merzimdi jáne jinaq salymdar boiynsha eń joǵary mólsherlemelerdi ai saiyn jariialaidy. Olar ózgerip otyrýy múmkin. Biraq sizdiń depozitińizdiń paiyzdyq mólsherlemesi depozit ashqan ýaqyttaǵydai bolyp qalady. Tek depozittiń merzimi bitkenshe nemese jańa merzimge uzartqansha ózgermeitinin bilgenińiz jón.
Skrin: QDKBQ resmi saitynan
Qazaqstannyń depozitterge kepildik berý qory merzimsiz, merzimdi jáne jinaq depozitterdegi aqshalardyń kepildik berilgen eń joǵary soma kóleminde saqtalýyna beriledi.
QDKBQ deregi boiynsha olardyń mólsheri:
• Shetel valiýtasyndaǵy depozitter boiynsha – 5 million teńge;
• Teńgedegi merzimsiz jáne merzimdi salymdar boiynsha – 10 million teńge;
• Teńgedegi jinaq salymdar boiynsha – 20 million teńge.
Eger bir bankte túri men valiýtasyna qarai ártúrli birneshe depozitińiz bar bolsa, QDKBQ kepildik beretin eń joǵary jiyntyq soma – 20 million teńge.
