QR Bas prokýratýrasy bankir Erjan Tátishevtiń ólim sebebi deregi boiynsha qylmystyq istiń jańa mán-jaiy ashylýyna bailanysty tergeý júrgizdi, - dep habarlaidy "Ult aqparat" kaz.tengrinews.kz portalyna silteme jasap.
Vedomstvo ókilderi Taraz qalalyq sotynyń 2007 jyldyń 3 qyrkúiegindegi úkimimen Murathan Toqmádidiń 2004 jyly Tátishevti ańshylyqta abaisyzda atyp alǵany úshin bir jylǵa bas bostandyǵynan aiyrylǵanyn (raqymshylyqpen jazadan bosatylǵanyn) eske saldy.
"Óz kezeginde jinalǵan materialdardan (kýágerlerdiń jaýaby, kúdikti M.Toqmádidiń jaýaby jáne saraptamalar qorytyndysy jáne t.b.) E.Tátishevtiń ólimi qarýdy qaýipsizdikti eskermei paidalanýdan emes, qasaqana basqa atqan oqtan kelgeni anyqtaldy. Osyǵan bailanysty 25 qazanda protsesstik prokýror QR QPK-niń 502 jáne 503-baptarynyń tártibinde Jambyl oblystyq sotyna M.Toqmádige qatysty úkimin joiýǵa negiz bar ekendigi jaily qorytyndy men jańa derekteri ashylǵan qylmystyq istiń óndirisin qaita jandandyrý boiynsha ótinish joldaidy", - delingen habarlamada.
Eske salaiyq, sottalǵan biznesmen Murathan Toqmádi sensatsiialyq málimdeme jasaǵan bolatyn. KTK telearnasy daiyndaǵan "Zvali ego Mýrka" atty filmniń ekinshi bóliminde ol bankir Erjan Tátishevti óltirgenin moiyndady.
"Shyny koroli" "Bank Turan Álem" bankiniń (qazirgi BTA Bank) basshysyn óltirýge tapsyrysty Muhtar Ábliazov bergenin málimdedi. Sóitsek, 13 jyl buryn bolǵan oqiǵa is materialynda aitylǵandai qaiǵyly oqiǵa emes eken. Toqmádidiń sózinshe, 2004 jyly ol dosy Tátishevpen birge Jambyl oblysyna ańshylyqqa shyqqan. Jolda ol bankirdi jelkesinen atyp, tergeýshiler men Ortalyq sot saraptamasy qyzmetkerlerine aqsha berip qutylǵan.
"Qylmystyq is QR IIM jedel-tergeý tobyna tergeýge jiberildi, ony Erjan Artyqbaev basqarǵan. Men odan maǵan jyly kózben qarap, maǵan qatysty qamaý túrindegi bultartpaý sharasyn tańdamaýǵa jáne tergeýde kómek berýin suradym. Osy maqsatta Artyqbaevqa, qatelespesem, 20 myń dollar aqshany konverge salyp, berip jiberdim. Ol ony portfeline saldy da, "Tam býdet vidno" dedi", - dep áńgimeledi Toqmádi.
