Niý-Iorktegi Taims-skverde bolǵan pyshaq shabýyly saldarynan 32 jastaǵy Erin Piachenti qaza tapty. Ol Bank of America kompaniiasynyń vitse-prezidenti bolǵan, dep habarlaidy ult.kz.
Oqiǵa 31 tamyzda bolǵan. Politsiianyń málimetinshe, 49 jastaǵy Pamela Sisneros sómkesinen eki pyshaq alyp shyǵyp, aldymen 68 jastaǵy ótip bara jatqan adamdy ishinen jaralaǵan. Keiin jaqyn mańdaǵy kóshede Erin Piachentige shabýyl jasap, oǵan ólimge ákelgen jaraqat salǵan.
Quqyq qorǵaý organdary kúdikti áieldi qarýyn tastaýǵa tórt minýt boiy kóndirýge tyrysqan. Alaida ol politsiia qyzmetkerlerine qoqan-loqy jasaǵan.
Áiel ofitserlerge qarai qozǵalǵan kezde politseiler ony elektroshokermen toqtatýǵa árekettengen. Alaida qurylǵylar iske qosylmaǵan. Osydan keiin politsiia qyzmetkerleri qarý qoldanyp, Sisnerosty jaralaǵan. Áiel alǵan jaraqatynan aýrýhanada qaitys boldy.
Politsiianyń málimetinshe, Sisneros psihikalyq buzylystan zardap shekken.
Bank of America ókilderi Erin Piachentidiń qazasyna bailanysty «qatty kúizelip, qaiǵyryp otyrǵandaryn» málimdedi. Kompaniia marqumdy ujymnyń qundy múshesi retinde atap, onyń jaqyndaryna kóńil aitty.
Erin Piachenti Fordhem ýniversitetinde bilim alǵan. Ol bolashaq kúieýimen de osy oqý ornynda tanysqan. Ýniversitet ókilderi onyń otbasyna kóńil aityp, qaiǵysyna ortaqtasty.
