Balyqshylardyń sý aidynynda qaza bolý jaǵdailary jiilep ketti, dep habarlaidy "Ult aqparat" Tótenshe jaǵdailar ministrliginiń resmi ókili Talǵat Ýálige silteme jasap.
Ań jáne balyq aýlaý maýsymy bastalǵannan beri (1 qazan-22 qarasha) eldiń sý aidyndarynda 12 adam, onyń ishinde 1 bala qaza tapty.
Balyq aýlaý kezinde ereje saqtamaǵan 11 adam qaza tapty jáne eresek adamdardyń qaraýynsyz qalǵan 1 bala abaisyzda sýǵa qulap, batyp ketti.
Biyl qaza bolǵandar Aqmola, Almaty, Qostanai, Qyzylorda, Mańǵystaý, Túrkistan oblystarynda tirkeldi.
Máselen, ótken kúz-qys maýsymynda (2019 jylǵy 1 qazannan bastap 2020 jylǵy 1 naýryzǵa deiin) elimizdiń sý aidyndarynda 37 adam (onyń ishinde 10 bala) kóz jumǵan .
Jazataiym oqiǵanyń negizgi sebepteri:
- 19 adam balyq aýlaý kezinde (jaǵalaýdan nemese qaiyqtan) sýǵa qulaǵan;
- 7 adam balyq aýlaý kezinde muz astyna túsip ketken;
- oinap júrip 8 bala muz astyna túsip ketken, 2 bala sýǵa qulaǵan;
- 1 adam muz ótkeli arqyly ótip bara jatqanda qulaǵan.
Aýmaq boiynsha alyp qarasaq, qaza bolǵandar Aqmola, Atyraý, Almaty, Aqtóbe, Shyǵys-Qazaqstan, Jambyl, Batys-Qazaqstan, Qostanai, Qaraǵandy, Soltústik Qazaqstan oblystarynyń jáne Almaty qalasynda tirkeldi.
Qys mezgilinde sý aidynynda qatań saqtalýǵa tiis qaýipsizdik erejeleri:
- táýliktiń qarańǵy ýaqytynda jáne nashar kóringen kezde muzǵa shyqpańyz;
- muzdyń juqa jáne qatpaǵan jerine shyqpańyz;
- muzdyń jekelegen ýchaskelerinde toppen jinalýǵa bolmaidy;
- muzdaǵy shuńqyrlarǵa, jaryqtarǵa, oiyqtarǵa jaqyndamańyz;
- avtomobilmen ótkelden tys jerge shyqpańyz.
