Sh.Aimanov atyndaǵy «Qazaqfilm» kinostýdiiasy Mádeniet jáne sport ministrliginiń tapsyrysy boiynsha Dýlat Isabekovtiń stsenariii negizinde Balýan Sholaq týraly tolyqmetrajdy kórkem film túsirmek.
Kinostsenarii M.Áýezov atyndaǵy qazaq memlekettik akademiialyq drama teatrynda sahnalanǵan «Jaýjúrek» pesasynyń jelisi boiynsha jazylǵan, dep habarlaidy "Ult aqparat" kinostýdiia baspasóz qyzmetine silteme jasai otyryp.
«Qazirgi tańda túsirilim toby tolyqtai jasaqtalǵan. Daiyndyq kezeńinde turǵan túsirilim filmge qajetti kiimderdi tigip, rekvizitter ázirlep, dekoratsiialar túrǵyzyp jatyr. Filmniń túsirilimderi Almaty jáne Soltústik Qazaqstan oblystarynda ótedi. Filmniń rejisseri - Nurgeldi Sadyǵulov», - delingen taratylǵan habarlamada.
Nurgeldi Sadyǵulovtyń aitýynsha, bul joba onyń kópten beri maqsat etken armany bolǵan.
«Men Balýan Sholaq tulǵasyna 1998 jyly T.Júrgenov atyndaǵy óner akademiiasynda oqyp júrgenimde qatty qyzyqtym. Sol kezden bastap, osy kisi jaily film túsirgim keldi. Balýan Sholaqtyń boiynda aqyndyq, serilik, ánshilik jáne alyp qara kúsh te bar. Onyń eline, jerine, otanǵa degen mahabbaty árqaisymyzǵa úlgi bolarlyq. Meniń oiymsha, búginginiń jastary Balýan Sholaqtai erdi bilýi tiis», - dedi filmniń rejisseri Nurgeldi Sadyǵulov.
Filmniń stsenarii birneshe jyl boiy jazylǵan jáne qaita óńdelgen. Túsirilim toby filmniń sapaly shyǵýy maqsatynda keńesshilerdi tartqan. Olardyń qatarynda: kórkemdik jetekshisi S.Narymbetov, kórkemdik keńesshileri E.Tóleýtai, B.Ystybaev, B.Bedelhandar bar.
Kartinaǵa tanymal akterlarmen qatar, ekranǵa alǵash shyǵyp jatqan debiýtanttar da túsedi. Biraq olardyń esimderi áli atalmai otyr.
«Akterlar irikteldi. Alaida bas keiipkerdi ázir aita almaimyn. Sebebi, eki akterdiń arasynda tańdaý ústindemin», - deidi rejisser.
