Foto:Massaget.kz
"Aqkent" shaǵyn aýdanynda bolǵan órt kezinde balkonnan sekirgen áieldi qutqarýǵa bolar edi. Bul týraly Almaty qalalyq Tótenshe jaǵdailar deparatmenti bastyǵynyń mindetin oryndaýshy Erlan Álibekov málimdedi, dep habarlaidy Sputnik Qazaqstan.
Onyń aitýynsha, órt kezinde adamdar qatty úreilenip, arty dúrbeleńge ulasqan. Turǵyndar balalaryn balkonnan laqtyryp jibergen, artynan ózderi de sekirip ketken. Alaida úidiń syrtynda qatty tútin baiqalmaǵan. Balkonda barlyq tesikti bitep, otyrýǵa bolar edi. Ol jerde taza aýa da bar. Qaza bolǵan áieldi de qutqarýǵa múmkindik bolǵan.
"Ol ýaqytta bizdiń qutqarýshylarymyz jaqyndap qalǵan. Olar 20 sekýnd kúte turǵanda alyp shyǵatyn edik. Órt sóndirýshiler esikti buzyp kirgende anasy bolǵan. Oǵan qutqarý qalpaǵyn kigizip, alyp shyqty. Sol kezde eki qyz sekirip ketti. Sál kúte turǵanda olardy da qutqaratyn edi", - dedi Álibekov arnaiy brifingte.
Tótenshe jaǵdai kezinde balkonnan sekirgen bir áiel aýyr jaraqat alyp, qaitys boldy. Al onyń ápkesi aýrýhanaǵa tústi. Sol kezde úide anasy da bolǵan. Ol syrtta qutqarýshylar bar dep oilady.
"Órttiń ishinde anasy da boldy. Anasymen keshe sóilestik. Úlken kisi eken. "Men ózim qyzdaryma jasym úlken, sekire almaimyn dedim, astynda qutqarýshylar bar, sender balkonnan sekirińder" dep aitqan eken. Sodan kishkentai bala bar, eki qyzy sekirgennen keiin bizdiń qutqarýshylar esikti buzyp kirgen", - dedi Almaty qalalyq Tótenshe jaǵdailar deparatmenti órt sóndirý jáne apattyq-qutqarý qyzmetiniń bastyǵy Aidar Sqabaev búgingi brifingte.
"Ashyǵyn aitý kerek, sol jerde órt sóndirý jetekshisine kóp adam kedergi jasady. Birinshi avtotsisterna kelgende adamdar júgirip kelip, meniń balamdy qutqar, meniń úiimdi qutqar dep, bári jan-jaqtan julmalaǵan. Balkonnan da aiqailap turǵan adam kóp boldy. Soǵan qaramastan, órt sóndirý jetekshisi óz adamdaryn baspaldaqpen úige kirgizgen, ary qarai olar árbir úidiń esigin buzyp, adam qutqarǵan", - dep atap kórsetti Sqabaev.
Onyń aitýynsha, qutqarýshylar ájege qutqarý qalpaǵyn kigizip, baspaldaqpen alyp shyqqan.
