Jer jánnaty Jetisý jerindegi ekotýrizmdi damytýda Alakól men Balqashtyń áleýeti zor. Týrizm – tabys kilti, desek damyǵan memleketter bul máseleni baiaǵyda jolǵa qoiǵan. Ýaqytpen birge bizdiń elimiz de bul salaǵa kóńil bólýdi bir júiege keltirýde. El turǵyndary úshin ishki týrizmdi jetildirý úlken mańyzǵa ie. Bul tarapta Alakóldiń Shyǵys jaǵynyń jaǵdaiy durystalyp, janǵa jaily oryndardyń kóptep boi túzep, halyq igiligine jarap turǵany kóńil qýantsa, Balqash kólindegi jaǵdai kerisinshe. Balqash kólinde jaryq ta, aýyz sý da, jol da joq.
«Óz elimizdegi Balqash kóline álemdegidei kókpen talasqan biik ǵimarattar salmasa da, eń qurmaǵanda kól jaǵalaýlaryna zamanaýi úlgidegi demalys oryndaryn salyp, halyqtyń demalýy úshin bar jaǵdailar jasalsa», deidi Balqash kólinde demalýshy almatylyq Gúlmira Asylbekqyzy.
Balqash kóli mańyndaǵy eń jaqsy degen «Býngala» demalys ornynyń iesi Býnko Tatiananyń aitýynsha, kólge jol 5 jyldan beri salynyp keledi.
«Týrbazanyń ashylǵanyna 7 jyl boldy. Jyl saiyn týrister sany artyp kele jatyr. Biyl Germaniia, Qytai elderinen saiahatshylar keldi. Kóbine bizge Reseiden keledi. Kelýshiler men saiahatshylardyń shaǵymy tek bireý – ol jol mashaqaty. Biriniń dóńgelegi jarylsa, biriniń kóligi júrýge tipti jaramai, evakýatormen alyp ketýde. Joldyń jasalyp jatqanyna 5 jyldan asty. Eki jyl bolǵan durystaý joldyń ózin joq qyldy. Joldyń jasalyp bitpeýi bizdiń bizneske keri áserin tigizýde. Biz óz taraptarymyzdan demalýshylar úshin múmkindiginshe bar jaǵdai men servisti jaqsartýǵa tyrysýdamyz. Jaryqty generator arqyly berýdemiz. Al, aýyz sýdy ózimiz alyp kelemiz. Balqash kólinde týrizmdi damytý úshin aldymen sý, elektr júiesin tartyp, jol salý qajet. Bul meniń ǵana emes, osyndaǵy demalys oryndary ieleriniń jan-aiqaiy dep bilseńizder», deidi «Býngala» demalys ornynyń iesi Tatiana Býnko.
«Respublica» partiiasynyń Jetisý oblystyq filialy men «Vizit Zhetysu» týristik ortalyǵynyń uiymdastyrýymen ótken úshkúndik press-týr aiasynda BAQ ókilderi sonymen qatar Jetisý óńirindegi ekotýrizmniń jai-kúiimen, problemalarymen jáne damý keleshegimen tanysty.
