Foto: Úkimet
Úkimet Memleket basshysynyń óńirlik kólik habtaryn damytý jáne áýe qatynasy qaýipsizdigin arttyrý jónindegi tapsyrmalaryn oryndaý sheńberinde Balqash qalasynyń áýejaiyn rekonstrýktsiialaýǵa Arnaýly memlekettik qordan 945 mln teńge bóldi, dep habarlaidy Ult.kz.
Nysandy rekonstrýktsiialaý jolaýshylarǵa qyzmet kórsetý sapasyn jaqsartýǵa jáne áýe ailaǵynyń negizgi parametrlerin halyqaralyq standarttarǵa sáikestendirýge múmkindik beredi. Onyń ótkizý qabileti 30%-dan astamǵa artady.
Qazirgi ýaqytta jumystardyń edáýir kólemi oryndalǵan. Atap aitqanda, áýejaidyń negizgi ǵimaraty men qosalqy nysandarynyń shatyry jóndelip, terezeler ornatylyp, káriz júiesi jáne sý qubyrynyń negizgi jelisi jańartyldy. Sondai-aq káriz-sorǵy stansasy, transformatorlyq qosalqy stansa, jeldetý jáne jylytý júieleri ornatyldy.
Sonymen qatar áýejai qyzmetin qamtamasyz etý úshin birinshi kezekte qajetti arnaiy aerodrom tehnikasyn satyp alý jumystary júrgizilýde. Búginde aerodromdyq órt sóndirý kóligi, jyljymaly trap, shaǵyn avtobýs jáne aerodromǵa arnalǵan janarmai quiý kóligi satyp alynǵan.
Prezident Joldaýyn júzege asyrý aiasynda elimizde aviatsiialyq infraqurylymdy damytý boiynsha keshendi jumystar júrgizilip jatqanyn atap ótý mańyzdy. Ol Astana, Almaty, Shymkent, Aqtóbede jáne basqa da iri qalalardaǵy jetekshi áýejailardy mýltimodaldy habtarǵa ainaldyrý úshin aýqymdy jańǵyrtý jumystaryn qamtidy. Sonymen qatar negizgi týristik aimaqtarda (Qatonqaraǵai, Zaisan, Kendirli) jańa áýejailar salý jáne óńirlik áýe ailaqtaryn qalpyna keltirý jumystary júrgizilýde.
